Dukagjini i Klinës është mposhtur në “Fadil Vokrri” në ndeshjen e parë të raundit të dytë kualifikues të Ligës së Konferencës. Të enjten mbrëma, Dukagjini pësoi 1:0 nga skuadra kroate, Rijeka.
Sfida u vendos në minutën e 30-të kur Niko Jankoviq shënoi supergol. Më pas Dukagjini ka kërkuar barazimin, ndërsa Rijeka ka kërkuar golin e dytë. Por nuk kishte shënime të tjera.
Skuadra e njohur kroate ka dominuar në të gjitha aspektet e lojës dhe është favorite e madhe për të avancuar tutje. Ndeshja e kthimit zhvillohet më 3 gusht në stadiumin “Rujevica” në Rijekë.
Rijeka ka pasur posedim të topit prej 62 për qind. Ka krijuar 16 raste gjithsej, për dallim nga pesë sa i kishte Dukagjini. Goditje në kornizë të portës, Dukagjini e kishte një, ndërsa Rijeka tetë.
Prej minutës së 62-të, Dukagjini ka luajtur me një lojtar më pak në fushë. Altin Merlaku u përjashtua pas kartonit të dytë të verdhë. Në minutat e fundit me karton të kuq u largua edhe trajneri i Dukagjinit, Armend Dallku.
Dukagjini për herë të parë po luan në gara evropiane. Në raundin e parë kualifikues të Ligës së Konferencës e kaloi Europan e Gjibraltarit.
