Analisti, Visar Xani, thotë se Serbia nuk ka pasur vullnet ta zbatojë marrëveshjen e Asociacionit, pasi sipas tij, shteti serb e ka përdorur këtë çështje për të përfituar në gjëra tjera.
Xani vlerësoi se po të themelohej më herët Asociacioni i komunave me shumicë serbe, i tërë presioni ndërkombëtar do të kthehej mbi Serbinë, shkruan teve1.info.
“Kjo çështje e Asociacionit do të ishte shumë më mirë nëse do përfundonte më herët. Por, nuk ka pasur disponim as te Beogradi që kjo çështje të kryhet, më shumë e ka përdorur si kauzë politike për të përfituar në gjëra tjera. Nëse kemi vetëm zbatim të marrëveshjes së kaluar për çështje të Asociacionit, nuk do të mund të kemi autonomi, por do të kemi një organizatë joqeveritare, ashtu siç janë organizatat tjera të regjistruara. Marrëveshjen e vitit 2013 e kemi të ratifikuar, Kosova e ka obligim ta kryej. Sikur Kosova të veprojë në këta hapa, Serbisë do t’i dilte maska e vërtetë dhe ajo do vazhdonte të mos e pranojë këtë Asociacion. Njëherit i gjithë presioni që është tani mbi Kosovën, do të kthehej mbi Serbinë. Në momentin kur zbatohet marrëveshja e 2013-ës, nuk do të ketë vend për rinegocim, por vetëm për mënyrën e implementimit të asaj marrëveshje”, deklaroi Xani në emisionin “Këndi i Debatit”.
Kujtojmë se marrëveshja për formimin e një asociacioni që do t’i bashkonte dhjetë komuna që banohen me shumicë nga serbët në Kosovë, cilësohet si një ndër marrëveshjet më problematike në dialogun për normalizimin e marrëdhënieve midis Kosovës dhe Serbisë./teve1.info/.
