Temperatura e dhomës është 32.5 gradë.
Në këtë nxehtësi Hazbie Nura punon çdo ditë në Pallatin e Drejtësisë si bashkëpunëtore profesionale.
Këto temperatura të larta po i paraqesin problem në punën dhe shëndetin e saj.
“Fillimisht kur vijmë n’zyre me mëngjes, sot ka qenë temperatura 32.5 si kam ardhë – është problem se na e kemi orarin e punës prej 8-ve deri në ora 4 edhe me nejt në këtë temperaturë kaq të lartë kur e dimë që edhe jashtë janë temperaturat shumë të larta është shumë problem”, tha ajo.
E si Nura edhe shumë punëtorëve të tjerë po u rrezikohet shëndeti në këtë pallat.
“Temperaturat e larta në objektin e Pallatit të Drejtësisë secilën herë e më shumë janë duke u rritur e që kjo gjendje ka ndikuar edhe në gjendjen shëndetësore të gjyqtarëve dhe stafit administrativ duke pasë parasysh se një pjesë e stafit administrativ janë në moshë të thyer e kjo gjendje është shqetësuese për ta”, tha Mirlinda Gashi nga Gjykata Themelore e Prishtinës.
Kjo gjendje sipas Shoqatës Sindikale në Pallatin e Drejtësisë vështirëson mbarëvajtjen e seancave.
“Edhe pse Gjykata është duke punuar edhe duke i kryer edhe mbajtë seancat, prapseprap po kemi tepër probleme në mbarëvajtjen e tyre”, deklaroi Naim Rrustemi nga kjo shoqatë.
Për këtë shkak, Këshilli Gjyqësor i Kosovës të martën autorizoi kryetarët e gjykatave në objektet e Pallatit të Drejtësisë, të reduktojnë punën për shkak të temperaturave të larta.
Tëvë1 ka kontaktuar për këtë problem me shefin e stafit të ministres së drejtësisë, Genc Nimoni, i cili ka thënë se e kanë përcjellë këtë çështje tek Ministria e Punëve të Brendshme, dhe siç tha ai, ata janë duke e trajtuar me prioritet dhe emergjencë këtë temë.