Ministria e Arsimit, Shkencës, Teknologjisë dhe Inovacionit dhe misioni i OSBE-së në Kosovë kanë prezantuar doracakun “Ndërkulturalizmi në Arsim”.
Qëllimi i këtij doracaku është nxitja dhe fuqizimi ndëretnik duke u bazuar në respektin e diversitetit, tha ministrja Arbërie Nagavci. Ajo tha se ndërkulturalizimi është i ngërthyer në kulturën e shtetit me komunitetet, gjuhët zyrtare të pakicave dhe politikat që garantojnë drejtësi dhe trajtim të barabartë të qytetarëve.
Nagavci theksoi se ky doracak është rezultat i bashkëpunimit të frytshëm të mësimdhënësve nga komuna dhe komunitete të ndryshme.
“Qëllimi i këtij doracaku është nxitja dhe fuqizimi i dialogut ndëretnik duke u bazuar në respektin e diversitetit, që sot kuptohet drejt si vlerë e jo vetëm në Kosovë por në gjithë botën. Në fakt ndërkulturalizmi është i ngërthyer në kulturën shtetërore të Kosovës, me komunitetet tona, me gjuhët tona zyrtare dhe ato të pakicave me gjithë politikat e qeverisë sonë të cilat garantojnë drejtësi dhe trajtim të barabartë dhe për të gjithë qytetarët e Kosovës pa dallim”, deklaroi Nagavci.
Tutje, Nagavci shtoi se kultura luan rol në krijimin e identitetit individual dhe shtetëror dhe që ndihmon për të njohur vetën dhe të tjerët.
“Arsimi ndërkulturor është shprehje e marrë pikërisht nga ky doracak dhe tek të cilat duhet të fokusohemi të gjithë. Është një shprehje vlerësojmë mjaft e qëlluar dhe tërheqëse, si për mësimdhënësit ashtu edhe për nxënësit. Njëkohësisht arsimi ndërkulturor është përshkrimi më i saktë i qëllimit të doracakut, sepse ushqen respektin, tolerancën, besimin dhe shumë vlera të tjera universale që na bashkojnë si qenie njerëzore. Koncepti i multikulturalizmit nënkupton thjesht disa kultura të gërshetuara në harmonimin me njëra-tjetrën dhe ne besojmë se Kosova është shembull klasik i multi-kulturës dhe multi-gjuhësisë, pra i një shoqërie vitale me kapacitete të shumta dhe me një perspektivë të hapur për të gjithë”, shtoi ajo.
Ministrja e Arsimit theksoi se promovimi i dialogut mes komuniteteve është një ndër objektivat e planit strategjik 2022-2026, për çka shtoi se edhe doracaku është në harmoni të plot.
Edhe ambasadori i misionit të OSBE-së në Kosovë, Michael Davenport theksoi se doracaku është hapi i parë për arritjen e objektives për ndërkulturalizimin.
“Një punë shume e madhe është bërë në punëtoritë, në gjysmën e dytë të vitit të kaluar. Doracaku është një rezultat i bashkëpunimit të ngushtë mes kolegëve të MAShT, mësuesve që përfaqësojnë komunitete dhe grupe të ndryshme si dhe konsulentëve ekspertë nga Qendra e Dialogut në Shkup. Shembulli juaj, atyre që janë të përfshirë në këtë punëtori për bashkëpunimin në këtë projekt është një model i shkëlqyer i bashkëpunimit dhe partneritet, mbi të cilën jam i sigurt se do të mund të ndërtojmë në të ardhmen”, shtoi ai.
Ai shtoi se duhet të ketë mundësi që fëmijët të mësojnë gjuhën e fqinjëve të tyre.
Shqipe Gashi Ramadani nga Divizioni për plan-programe dhe tekste shkollore në MAShTI tha se doracaku përbëhet prej dy pjesëve, ku mbështetet në filozofinë e ndërkulturalizimit.
“Manuali ofron orë model për lëndë të ndryshme mësimore për klasa te ndryshme të arsimit obligativ nga klasa e parë deri në klasën e nëntë. Nxënësit mund të mësojnë përmes matematikës, përmes shkencave, përmes lëndëve shoqërore mund të mësojnë për ndërkulturalizimin. Temat e ndërkulturalizimit të cilat trajtohen në manual fillojnë prej cështjeve globale duke vazhduar me temat në nivel të Kosovës. Doracaku fillon me konceptet e ndërkulturalizimit, me diversitetin kulturor, me familjet e popujve të ndryshëm që jetojnë në botë, me personalitete të ndryshme botërore, me procese të ndryshme shoqërore dhe natyrore dhe vazhdon tutje me ndëkulturalizimin në Kosovë”, u shpreh ajo.
Në doracak thuhet se arsimi ndërkulturor është një trend arsimor bashkëkohor, por edhe përgjigje konstruktive globale ndaj proceseve intensive te migrimit dhe diversitetit të komuniteteve shoqërore që pasqyrojnë heterogjenitetin kulturor, gjuhësor dhe etnik./kp