Është kapluar nga flakët objekti i marketit ETC në Klinë mëngjesin e së shtunës, raporton teve1.info
Lajmin për teve1.info e ka konfirmuar zëdhënësi i Policisë për Rajonin e Pejës, Fadil Gashi, i cili tha se nuk ka viktima në njerëz mirëpo zjarri ende nuk është lokalizuar.
Gashi tha se policia është njoftuar nga sigurimi i objektit për djegien e marketit rreth orës 6:30 të mëngjesit.
Sipas tij, fillimisht ka intervenuar në shuarjen e zjarrit njësia e zjarrfikësve në Klinë, pastaj atyre iu kanë bashkuar edhe zjarrfikësit e Pejës, Istogut dhe Deçanit.
Gashi tha se afër objektit ku po digjet, ndodhet edhe një pompë e derivateve, mirëpo shtoi se njësitet përkatëse nuk do të lejojnë që të rrezikohet nga flakët.
“Sot rreth orës 6:30 minuta të mëngjesit Policia në Klinë është njoftuar nga sigurimi i ETC-së në Klinë se zjarri e ka kapluar objektin. PK menjëherë i ka njoftuar zjarrfikësit dhe ka dalë në vendin e ngjarjes.
Më vonë janë njoftuar dhe kërkuar ndihmë edhe nga zjarrfikësit e Pejës, Istogut dhe Deçanit të cilët janë duke bërë përpjekje që ta shuajnë zjarrin.
Viktima në njerëz nuk ka. Është një pompë shumë afër, ka rrezik me marrë flakë por janë zjarrfikësit aty dhe shpresojmë se nuk do të lejojnë që të rrezikohet pompa e derivateve”, tha ai.