Guri përkujtimor i Pashke Markajt, nënës që dogji vetën pas kthimit dhe varrimit të mbetjeve të bijve të saj të vrarë dhe të djegur nga kriminelët serbë, është larguar nga një pronë private në Korenicë të Gjakovës.
Lajmi është konfirmuar edhe nga familjarë të Markajt.
“Asnjë shkëmb nuk do mund ta përshkruante dhimbjen e Nanës Pashkë për bijtë e vrarë nga forcat armike serbe dhe as një gur i hequr nuk mund ta zbehë kurrë sakrificën dhe mesazhin e saj për Boten me aktin e Vetëflijimit”, ka shkruar Flamur Markaj.
Lidhur me këtë ka reaguar edhe Lëvizja Vetëvendosje në Gjakovë, duke theksuar se një veprim i tillë nga ana e pronarit është i papranueshëm.
“Një akt i tillë nga pronari i tokës i cili fillimisht kishte pranuar vendosjen e asaj shenje përkujtimore në tokën e tij, ndërsa tani pa një arsye të qëndrueshme dhe logjike vendosë të bëjë një akt të tillë, është i pa pranueshëm dhe i dënueshëm, ngase tragjedia e Nënës Pashke dhe familjes Markaj nuk është vetëm e tyre, por është tragjedia jonë si popull, andaj përdhosje të tilla nuk mund të tolerohen. Ju bëjmë thirrje fillimisht pronarit të tokës e më pas institucioneve vartëse, që sa më parë të mirren masat adekuate dhe ajo shenjë përkujtimore të kthehet në vendin e saj”, është theksuar në reagim.
Më 27 prill 1999, forcat e Serbisë ia rrëmbyen, vranë dhe zhdukën me forcë dy djemtë.
Gjovalini dhe Milani nga Korenica e Gjakovës, u gjetën në varrezën masive në Batajnicë të Serbisë.
Më 24 maj 2003 u bë rivarrimi i tyre. Tri ditë më vonë, nëna Pashke dogji veten me benzinë, për t’i dhënë fund jetës së saj dhe dhembjes për të bijtë./KP/
