Profesori i shkencave të mjedisit, Sami Makolli, vlerësoi që Kosova qëndron ende mirë sa i përket temperaturave maksimale, krahasuar me disa vende tjera.
Më tej, Makolli tha se Kosova nuk do të jetë e rrezikuar nga zjarri, pasi temperaturat nuk kanë arritur mbi 40 gradë.
“Kosova qëndron ende mirë sa i përket temperaturave maksimale, nuk ka ndonjë rekord që jep shqetësim. Ka pasur vera të kaluara që kanë qenë më të nxehta. Momentalisht kemi temperatura normale, kemi fatin që nuk kemi shumë temperatura të larta në krahasim me disa vende tjera. Parashihet gjithmonë që pasojat e ngrohjes globale e vuajnë shtetet e varfra, e në këtë rast është Kosova, për shkak të mospërgatitjes për t’u përballur me problemet që vijnë. Çdo herë e më shumë kemi vërshime nga shiu, për shkak se ngrohja globale e përshpejton ciklin e ujit. Kosova nëse ka kujdes nuk do të jetë e rrezikuar shumë nga zjarri, sepse ende nuk kemi pasur temperatura mbi 40 gradë”, deklaroi Makolli në emisionin “InfoNata” në Tëvë1.
Temperaturat në vendin tonë kanë shënuar rritje ditët e fundit.
IHMK u ka bërë thirrje qytetarëve që të respektojnë këshillat e Institutit Kombëtar të Shëndetësisë Publike të Kosovës (IKSHPK) që nga ora 09:00 deri në 17:00 të mos jenë në kontakt direkt me rrezet e diellit./teve1.info/
