Qeveria e ka kaluar propozim-vendimin për themelimin e Grupit Koordinues për anëtarësimin e Kosovës në Këshillin e Evropës.
Në fjalën e tij hyrëse kryeministri Kurti ka thënë se emërimi i këtij grupi është në fazën fillestare
“Procesi i Aplikimit [në Këshillin e Evropës] gjendet te Asambleja Parlamentare e Këshillit të Evropës e cila do të japë opinionin e saj nëpërmjet përpilimit të disa raporteve për të drejtat e njeriut, sundimin e ligjit dhe gjendjen e demokracisë. Do të ketë vizita faktmbledhëse nga ekspertë dhe deputetë të Këshillit të Evropës. Për të arritur koordinimin dhe bashkëpunimi ne brendshëm dhe për të ofruar një pasqyrë sa më të saktë, Ministria e Punëve të Jashtme dhe Diasporës ka propozuar krijimin e një grupi koordinues ndërinstitucional i cili është në fazën fillestare. Do të jetë një grup dinamik i cili më vonë do të përfshijë edhe akterë të tjerë e nga shoqëria civile”, ka thënë Kurti.
Ministrja Gërvalla ka thënë se ky grup është i nevojshëm që Kosova të jetë e përgatitur për kërkesat dhe raportet që do t’i vijnë.
“Nëse për etapën e parë ka mjaftuar koordinimi i mirë mes Qeverisë, Parlamentit dhe Presidencës, në fazën e dytë do të na nevojitet një bashkëpunim shumë më i ngushtë ndërinstitucional me qëllim që të jemi të përgatitur për të gjitha kërkesat dhe raportet që do të na vijnë. Prandaj kemi propozuar krijimin e një grupi koordinues që ka për detyrë të zhvillojë komunikim dhe bashkëpunim ndërinstitucional duke shkëmbyer informacione që lidhen me procesin e anëtarësimit dhe duke hartuar raporte për çështje specifike në fazën e përgatitjes së opinionit të Asamblesë Parlamentare të Këshillit të Evropës. Meqenëse më 24 prill kemi përmbushur me sukses fazën e parë të anëtarësimit, tri komitete të Asamblesë Parlamentare, ai për Çështje Politike dhe Demokraci, ai për Çështje ligjore dhe të Drejtat e Njeriut dhe komiteti për Jodiskriminim dhe Barazi do të përpilojnë raporte”, ka thënë Gërvalla.
Ajo tutje ka njoftuar për emrat e raportuesve për Kosovën në komitetet e Këshillit të Evropës.
“Në kuadër të Komitetit për Çështje Politike raportuese është Theodora Bakojanis, ish-ministre e Jashtme e Greqisë…Komitetit për të Drejtat e Njeriut zgjodhi Azeta Rojan, anëtare e delegacionit suedez të Asamblesë Parlamentare të Këshillit të Evropës ndërsa pritet emërimi i raportuesit të komitetit për Jodiskriminim dhe Barazi”, ka thënë Gërvalla.