Kryetarja e Komisionit për Mbikëqyrje të Punës së Agjencisë së Kosovës për Inteligjencë, Ganimete Musliu bëri të ditur se kabineti i Kryetarit të Kuvendit që dy vite e gjysmë të gjitha ftesat që kanë ardhur në fushën e inteligjencës nga shtete të ndryshme nuk i ka dërguar te komisioni.
Musliu thotë se ajo do duhej të ishte patjetër e pranishme në të gjitha konferencat e seminaret, derisa e quajti të padrejtë pjesëmarrjen e deputetëve tjerë në këto tryeza.
“Unë jam kryetare e Komisionit për Mbikëqyrjen e Agjencisë së Kosovës për Inteligjencë. Që dy vite e gjysmë, të gjitha ftesat që kanë ardhur në fushën e inteligjencës nga shtetet e ndryshme të botës, kabineti i kryekuvendarit, Glauk Konjufca, nuk e ka deleguar asnjë ftesë tek komisioni. E para që vjen në rend për të marrë pjesë në ato konferenca, samite e seminare, jam unë. Të gjitha tryezat që janë mbajtur në fushën e inteligjencës jashtë vendit, deputetët e Kosovës kanë marrë pjesë padrejtësisht. Ne si komision jemi në terr informative se çka është diskutuar në ato konferenca”, deklaroi Musliu në emisionin “Këndi i Debatit” në Tëvë 1.
E pyetur se çka ka ndërmarrë lidhur me këtë çështje, Musliu tha se e ka ngritur si problem në Komisionin Parlamentar, por se rezultati ka qenë përsëri zero.
“Unë e kam ngritur këtë çështje në Komisionin Parlamentar, ku nënkryetar është Salih Zyba i Lëvizjes Vetëvendosje. Unë e kam diskutuar disa herë, në mënyrë shumë njerëzore kam biseduar me kryekuvendarin, Glauk Konjufca. I ka dërguar disa këshilltarë të vet, kam diskutuar me ta dhe rezultati ka qenë zero. Jo vetëm e frikshme, por është e jashtëligjshme”, shtoi tutje Musliu në Tëvë1.
“A e din çfarë më ka mbetur mua pa bërë, vetëm t’iu shkruaj shteteve pritëse, por unë nuk mund ta shaj shtetin tim te shtetet pritëse”, theksoi deputetja e PDK-së tutje.
Kujtojmë që ky komision rregullisht udhëhiqet nga grupet parlamentare opozitare./teve1.info/.
