Situata e tensionuar në veri të Kosovës ka bërë që vendet aleate si ato të Bashkimit Evropian dhe Shtetet e Bashkuara të Amerikës të paralajmërojnë Kosovën për pasoja në raportet bilaterale.
Lidhur me këtë, ish-ambasadorja e Kosovës, Alma Lama, vlerësoi se dëmi që i është bërë Kosovës do të jetë afatgjatë, derisa shtoi që riparimi i imazhit të saj nuk mund të bëhet më vetëm nga një qeveri.
“Çështja e imazhit të shtetit është shumë e komplikuar. Siç po e shihni për pak muaj po rrënohet imazhi i Kosovës. Do të jetë afatgjatë dëmi që i është bërë Kosovës në këtë rast. Për ta riparuar, nuk duhet më vetëm një qeveri, por ndoshta shumë qeveri. Por, është vështirë të riparohet imazhi që japin mediat ndërkombëtare. Kjo mënyrë e sjelljes së Qeverisë aktuale, është shumë amatoreske. Kjo politikë e sotme është politike e konfrontimit me partnerët ndërkombëtarë”, deklaroi Lama në emisionin “Ditari” në Tëvë1.
Madje sipas saj, Qeveria Kurti po i bën dhurata Serbisë në raport me aleatët ndërkombëtarë.
Më tej, kjo e fundit tha se e tërë situata në veri të vendit, nuk është në interes të Kosovës aspak.
“Është aq e çuditshme se ku janë qëllimet e Kurtit, saqë nuk po e kuptojmë. Por, s’ka rëndësi qëllimi, ka rëndësi rezultati. Kosova do duhej të bashkëpunonte fuqishëm me të gjithë partnerët e saj.”, theksoi tutja Lama.
Kujtojmë që masat e BE-së përfshijnë pezullimin e ftesave për pjesëmarrjen e Kosovës në ngjarje të nivelit të lartë, si dhe të vizitave dypalëshe nga BE-ja dhe vendet anëtare. Po ashtu janë paralajmëruar pasoja financiare, përkatësisht pezullimi i financimit të disa projekteve të propozuara nga Kosova në kuadër të Kornizës Investuese të Ballkanit Perëndimor./teve1.info/
