Ministrja e Punëve të Jashtme të Kosovës, Donika Gërvalla, ka reaguar pas kritikave ndaj saj e cila në Forumin e Dubrvonikut, ka thënë se Bashkimi Evropian nuk është në gjendje të garantojë siguri dhe paqe, pa NATO-n dhe SHBA-në.
Ajo në reagim ndaj kritikëve të saj ka thënë se i sifidon “”specialistët”, të tregojnë se cila pjesë e deklarimit të saj është gabim.
“I sfidoj publikisht “specialistët”, që para se të mësyjnë me sulme personale dhe etiketime nga më absurdet, të na tregojnë saktë se cila nga shkronjat e citatit të mësipërm është e pasaktë apo e pavërtetë. Unë jam zëvendëskryeministre dhe ministre e Republikës së Kosovës, nuk jam zëdhënëse as e BE-së dhe as një mekanizmi tjetër. Si çdo politikan i përgjegjshëm, me fanatizëm dhe zë të lartë mbroj të vërtetën dhe interesin e vendit tim, dhe vetëm të vendit tim, kudo që më krijohet mundësia të flas, ashtu si edhe të tjerët mbrojnë interesin e vendeve apo organizatave që përfaqësojnë”, ka shkruar ajo në Facebook, përcjell teve1.info.
Ajo ka përmendur edhe partitë opozitare, “gjendja e mjerushme e tyre”, sipas saj, është një nga fatkqësitë e Kosovës.
“Si gjatë qeverisjes edhe tani në opozitë janë pa plan, pa strategji, pa vizion, pa dinjitet. Opozitë që përveç sulmeve personale, të bazuara në thashetheme dhe tituj bombastik dhe të pasaktë, asgjë nuk ofron. E sa për PDK-në, e cila tenton të na frikësojë që, nëse ajo vjen në pushtet, ne nuk paskemi më vend në Kosovë, mundem vetëm t’iu përkujtoj që nuk janë të parët që nuk dëshirojnë të më shohin as fizikisht në vendin tim. I kam pasur vetëm 8 vjet kur më kanë përzënë për herë të parë nga vendi im. Por ata që për 19 vjet me radhë (1980-1999) më privuan nga e drejta për t’u kthyer në vendin tim, madje as edhe sa për të kthyer eshtrat e babait në tokën e tij, janë ata që nuk kanë më vend në Kosovën e lirë. E për LDK-në, nuk po flas sonte. Po flasin kaq shumë vet, po vajtojnë, shajnë, mallkojnë e gënjejnë, saqë çdo fjalë nga ime do të ishte e tepërt”, ka shkruar Gërvalla.
Fjalimi i Gërvallës ishte cilësuar si rrezikshëm dhe i dëmshëm për Kosovën nga partitë opozitare. Madje është kërkuar edhe shkarkimi i saj.
Pjesë nga fjalimi që ngjalli reagimi të cilin e ka publikuar edhe vetë Gërvalla.
“Një pyetje kyçe për sigurinë në Ballkanin Perëndimor është: A është BE-ja ajo që mund të garantojë sigurinë dhe paqen në Evropë? Unë mendoj që ajo nuk është në gjendje dhe nuk ka kapacitet për ta garantuar sigurinë. Arsyet janë të qarta: mungon vullneti politik, mospajtimet brenda Bashkimit Evropian janë të mëdha dhe sa i përket sigurisë, pa SHBA-në dhe NATO-n, BE-ja është një tigër prej letre. BE-ja e di këtë dhe prandaj vazhdimisht lëshon pe, i ikën konfrontimit”, kishte thënë ajo./teve1.info/
