Ministrja e Punëve të Jashtme të Kosovës, Donika Gërvalla ka thënë Bashkimi Evropian nuk mund të garantojë siguri dhe paqe në rajon pa NATO-n dhe Shtetet e Bashkuara të Amerikës.
Ajo në arsyetimin e saj për këtë ka thënë se brenda vendeve të BE-së nuk ka vullnet politik dhe unitet.
“ Pyetja kyçe është për sigurinë në Ballkanin Perëndimor është se a mund dhe a është Bashkimi Evropian unioni që mund të garantojë siguri dhe paqe në Evropë? Vlerësimi im është që BE-ja nuk mundet. Sepse nuk është në gjendje dhe e aftë për të ofruar siguri. Arsyet janë të dukshme: nuk ka vullnet politik, ka shumë mospajtim në union dhe pa SHBA-në dhe NATO-n, BE-ja është një ‘Paper Tiger’ në aspektin e sigurisë. Për shkak se ju e dini këtë, kërkoni paqe në vazhdimësi. Mirëpo, kjo është e rrezikshme. Paqësimi i BE-së me Rusinë ka bërë që Putini të përshkallëzojë”, ka thënë ajo në fjalimin e saj në Forumin i cili po mbahet në Dubrovnik.
Ajo ka thënë se Kosova është rreshtuar me vendet tjera të Perëndimit kundër luftës së Rusisë në Ukrainë, duke thënë se Serbia po e ndihmon Rusinë.
“Jemi rreshtuar për rreth 90 për qind me Perëndimin kur bëhet fjalë për Ukrainën. Të tjerët që i kemi përreth po e ndihmojnë Rusinë në agresionin e saj për pothuajse dy vjet tashmë pa sanksione nga Bashkimi Evropian”.
Gërvalla foli edhe për dialogun me Serbinë, teksa tha se në Kosovë në dy vitet e fundit ka skepticizëm dhe mosbesim në kapacitetin e diplomacisë së BE-së, teksa propozoi strategji të re dhe njerëz të ri në dialog.
Në këtë samit të pranishëm ishin edhe përfaqësuesi i Lartë i BE-së për Politikë të Jashtme dhe Siguro, Josep Borrell dhe i dërguari i SHBA-së për Ballkanin Perëndimor, Gabriel Escobar./teve1.info/