Instituti Hidrometeorologjik i Kosovës ka dalë me një njoftim pas vërshimeve të mbrëmshmë në Pejë, të cilat ia morën jetën nënë e bir nga ky qytet.
Nga ky institut thonë se për shkak të sasisë së madhe të reshjeve, vërshimet ishin të pashmangshme.
“Gjatë orëve të pasdites (e shtunë 24/06/2023), kemi pasur një situatë të rënduar me reshje të shiut sidomos në regjionin e Pejës ku janë shkaktuar vërshime të shpejta. Situata e rënduar me vërshime në Pejë, ka ardhur si rrjedhojë e reshjeve të shiut me intensitet shumë të lartë, ku vetëm brenda 1h e 9 min. (Nga ora: 19:35 deri 20:44), kanë rënë 54.6 mm (l/m2). Kjo sasi e reshjeve për interval kohorë aq të shkurt, është e pa shmangshme pa shkaktuar vërshime, në këtë rast atyre urbane”, thuhet në njoftim.
IHMK thonë se reshje me intensitet të theksuar mund të ketë edhe sot pasdite.
“Gjatë orëve të pasdites së sotme dt: 25/06/2023, do të ketë reshje shiu të cilat në pjesën perëndimore dhe verior të vendit do të jenë me intensitet dhe shtrirje më të theksuara. Situata do të filloj gradualisht të stabilizohet gjatë ditëve në vijim”, thuhet në njoftim.
Kurse sa i përket lumit Bistrica, instituti thotë që nuk ka rrezik të ketë përmbytje lumore.
