Ka vazhduar të enjten protesta e serbëve në komunën e Leposaviqit, e filluar katër javë më parë, raporton teve1.info
Gazetarja e Teve1, Florijeta Dernjani e cila po e përcjell këtë protestë gjatë ditës së enjte, tha se pak qytetarë po protestojnë qetë, duke qëndruar nën tendat e vendosura në rrugë apo edhe nëpër kafene.
Sipas Dernjanit, KFOR-i po e mbikëqyrë protestën e serbëve, mirëpo që gjatë të enjtes nuk janë shfaqur tensione.
Serbët lokal në këtë komunë e filluan protestën katër javë më parë, në ditën kur kryetari i zgjedhur shqiptar, Lulzim Hetemi, e filloi punën.
Për katër javë rresh qytetarët serbë të kësaj ane nuk e kanë ndalur protestën, duke e kundërshtuar kryetarin e sapozgjedhur.
Gjatë javëve të kaluara protestuesit serbë kishin sulmuar mediat, policinë e KFOR-in.
Disa gazetarë, kameramanë e ushtarë të KFOR-it kanë pranuar tretman mjekësor si pasojë e sulmeve në këto protesta.
Deri më tani, Policia e Kosovës ka arritur t’i identifikoj disa të dyshuar për sulme në protestat e komunave veriore, të cilët i ka arrestuar.