Shqipëria ka shënuar fitore të madhe të martën mbrëma. Fitoi 3:1 në udhëtim tek Ishujt Faroe dhe kështu doli në vendin e dytë në grup. I ka gjashtë pikë nga tri ndeshje në Grupin E. Çekia udhëheq me shtatë pikë, ndërsa Moldavia është e treta me pesë pikë. Polonia ka rënë në pozitën e katërt me tri pikë nga tri ndeshje. Ishujt Faroe mbesin në vendin e fundit me vetëm një pikë.
Nedim Bajrami shënoi për 1:0 në minutën e 20-të. Në fund të pjesës së parë, Ishujt Faroe barazuan rezultatin përmes Odmar Faero.
Por me të nisur pjesa e dytë kuqezinjtë kaluan para. Kristjan Asllani shënoi supergol në minutën e 51-të. Ai goditi mjeshtërisht nga distanca.
Fare në fund, në minutën e 91-të, Ernest Muçi konkretizoi me gol një aksion model. Kështu Shqipëria është në situatë shumë të mirë për kualifikim në Evropianin e vitit 2024.
