Profesori universitar, Arben Fetoshi i ka komentuar deklaratat e emisarit amerikan, Gabriel Escobar se tensionet mes Kosovës dhe Serbisë mund të shndërrohen në konflikt rajonal.
Fetoshi ka thënë se kuptimi i kësaj deklarate është që kryeministri Kurti duhet të reflektojë urgjentisht.
“Paralajmërimet shqetësuese të Escobarit, unë jam i prirur me i pa në kontekst të asaj që e ka karakterizuar komunikimin politik të Prishtinës me krejt vendet e rajonit, me krejt vendet e perëndimit dhe në veçanti me kryeministrin Rama. Në qoftë se e kemi parasysh një deklaratë të ashpër të Tiranës zyrtare sa i përket Serbisë lidhur me kidnapimin e tre policëve të Kosovës, është krejt normale pastaj që nëse krejt këto zhvillime i vendosim në kontekst të interesit të Putinit për me e shtri konfliktin diku tjetër, është shqetësim që e dëgjojmë prej të dërguarit amerikan. Është shqetësim ndaj të cilit nënteksti thotë që kryeministri jonë duhet të reflektojë urgjentisht”, ka thënë Fetoshi në Këndin e Debatit në Tëvë 1.
Fetoshi tutje ka shtuar se është i bindur që takimi në Bruksel do të ndodhë dhe se presidenti serbe, Aleksandar Vuçiq po mundohet ta ‘ngrisë pazarin’ që do ta përfitojë në raport me Kosovën.
“Mendoj që përgjigja që e dëgjuam prej kryeministrit Kurti është gjithashtu shqetësuese sepse ai po përpiqet të manifestojë një gjuhë që reflekton qetësi, siguri dhe që komunikon ka pak me cinizëm dhe me ironi me deklarata të tilla të zyrtarëve të lartë të ShBA-së dhe BE-së. Sa i përket takimit jam i bindur që do të ndodhë, për shkak se jam i bindur që krejt këto që po i bën Vuçiq janë taktika që konsistojnë në maksimalizimin e çmimit që do të përfitojë në betejën me Kosovën. Vuçiq ka paralajmëru (që s’do të marrë pjesë në takim) sepse ka dashtë me e ngrit pazarin sa i përket veprimeve institucionale të Kosovës në veri”, ka shtuar ai.
