Deri tani janë arrestuar tre serbë të cilët kanë sulmuar gazetarët kosovarë gjatë raportimit për protestat në veri të Kosovës.
Për këtë çështje në emisionin Ditari në Tëvë1 ka folur eksperti i fushës së sigurisë, Fatmir Çollaku.
I pyetur se a mund të ketë interferime nga ndërkombëtarët në këtë proces, Çollaku tha se nuk duhet të ketë përfshirje politike e as përfshirje nga faktori ndërkombëtar.
Kjo pasi sipas Çollakut, kur ekzistojnë provat dhe dëshmitë e mjaftueshme, atëherë nuk duhet të ketë interferime dhe siç tha ai, nuk duhet t’i vihen pengesa as politike e as të natyrave të tjera.
“Nga aspekti hetimor kur ka bazë juridike ka prova dhe dëshmi të mjaftueshme që një person që të arrestohet se ka kryer vepër penale. Më pastaj ato prova dhe dëshmi në harmoni të plotë me procedurën penale procedohen tutje deri te Gjykata. Natyrisht që faktori politik dhe faktorët tjerë nuk duhet të përzihen fare, gjegjësisht nuk bën të kenë interferime sepse rruga ligjore dihet do me thënë prej fillimit të kallëzimit penal në ngritje të aktakuzës, deri te përfundimi me aktgjykim të formës së prerë. Pra është një rrugë e gjatë autonome të cilës rrugë nuk bën t’i vihen pengesa, as të natyrës politike, e as të natyrave të tjera “, tha Çollaku.
Ndryshe gjatë ditës Policia e Kosovës, ka arrestuar edhe një serb tjetër, pasi që i njëjti dyshohet për sulmet ndaj gazetarëve më 16 qershor në Leposaviq.
Urosh Vukasinoviq është i arrestuari i tretë për sulmet ndaj gazetarëve që janë bërë në veri të vendit, ku nëntë prej tyre kanë pësuar lëndime trupore si pasojë e gurëve dhe shok-bombave që janë hedhur në drejtim të tyre nga protestuesit serbë.
Arrestimin e Vukasinoviqit e ka konfirmuar ministri i Brendshëm, Xhelal Sveçla.
Sipas Sveçlës këta kriminelë po marrin urdhra për këto sulme nga Beogradi, por që të njëjtit ai tha se tashmë do të përballen me drejtësinë./teve1.info./
Arrestohet edhe një person për sulmin ndaj gazetarëve në veri