Profesori universitar, Arben Fetoshi vlerëson se anulimi i mbledhjes së përbashkët nga kryeministri Edi Rama duhet të shihet si një paralajmërim serioz sa i përket marrëdhënieve të Kosovës me ndërkombëtarët.
Fetoshi vlerëson se oferta e Ramës është rruga e duhur pasi që sipas tij kryeministri Kurti po tregon “egocentrizëm”.
“Unë do të doja që ky anulim të shihet si një paralajmërim serioz, si një paralajmërim i frikshëm nga ana e kryeministrit Edi Rama sa i përket marrëdhënieve të Kosovës me komunitetin euroatlantik siç e quajti ai dhe natyrisht oferta e kryeministrit Rama mendoj se është rruga e duhur sepse kryeministri jonë për fat të keq ka ditë, në veçanti në 10 ditëshin e fundit që nuk tregon vullnet dhe nuk e kapërcen dot egocentrizimin e tij për t’u kthy në një komunikim normal”, ka thënë Fetoshi.
Sipas tij ky vendim nuk është sanksion por në përputhshmëri të plotë me linjën euroatlantike.
“Nuk është sanksion, është një reagim në përputhshmëri të plotë me linjën euroatlantike, i një anëtari të NATO-s që në këtë rast ka afinitete shumë më të mëdha për shkak të lidhjeve tona të gjakut, historisë tonë të përbashkët dhe për shkak të një roli që ai mendon se e ka për obligim ta luajë në këto rrethana kritike për Kosovën në raport me bashkësinë ndërkombëtare. Dhe kështu duhet ta shikojmë krejt angazhimin e kryeministrit Edi Rama sa i përket situatës së tensionuar në veri të Kosovës”, ka deklaruar Fetoshi në Këndin e Debatit në Tëvë 1.
