Një rast i sulmit seksual është publikuar dje dhe dyshohet të ketë ndodhur në shkollën “Lidhja e Prizrenit” në Deçan, ku mësimdhënësi Valentin Selmanaj është filmuar fshehurazi duke e puthur një nxënëse të klasës së shtatë.
Besarta Breznica nga Rrjeti i Grave të Kosovës, u bëri thirrje Ministrisë së Arsimit që ato të bëjnë hetime brenda shkollave, e njëherit ta mbahen trajnime për edukatorët e psikologët, shkruan teve1.info.
“Raste të tilla e shtojnë pyetjen që edhe sa raste të tjera mund të kenë ndodhur brenda objekteve shkollore. Rasti i tillë i publikuar në media, është një thirrje ndaj shoqërisë dhe institucioneve, që t’i hapin sytë për t’i trajtuar rastet në mënyrë të duhur. Në kodin penal të Republikës së Kosovës, duhet të ndalohen tërësisht nga puna, e jo vetëm të suspendohen, në të njëjtën anë duhet të ndodhë patjetër edhe dënimi. Kjo është një thirrje për Ministrinë e Arsimit që ato të bëjnë hetime brenda shkollave, gjithashtu të mbahen trajnime për edukatorët e psikologët për forma të ndryshme të dhunë në baza gjinore”, deklaroi Breznica në emisionin “Ditari”.
Ndërkaq, e pyetur se pse po ndodhin këto raste, Breznica tha se Kosova është e rrethuar nga një shoqëri patriarkale.
“Përderisa kemi një shoqëri e cila beson dhe mendon që trupi i grave është në shërbim të tyre, padyshim që raste të tilla do të ketë. Kështu që, Rrjeti i Grave të Kosovës fton të gjitha organet kompetente që të respektojnë legjislacionet që ka Kosova, në mënyrë që dhunuesit dhe autorët e krimit të marrin dënimin e merituar”, theksoi tutje Breznica në Tëvë1.
Më tej, kjo e fundit tha se organet shkollore duhet të jenë institucione ku vajzat duhet të ndihen të sigurta, pa sulme, e pa ngacmime, aq më pak nga mësimdhënësit.
Përveç arrestimit, Selmanaj edhe është suspenduar nga puna pasi ndaj tij kanë nisur hetimet, nën dyshimin se ka kryer veprën penale “Sulm seksual”./teve1.info/.