Kryeministri i Shqipërisë, Edi Rama ka thënë se një draft të Asociacionit të Komunave me shumicë serbe ia ka dorëzuar BE-së dhe ShBA-së.
Rama tha se ky draft është punuar nga disa ekspertë të huaj.
“Dje i kam përcjellë kancelarit Scholz dhe presidentit Macron një draft të Asociacionit. Për atë e kam vënë në dijeni dhe kryetarin e Këshillit Evropian Charles Michel dhe palën amerikane. Është një draft i punuar nga ekspertë të nivelit më të lartë amerikan dhe evropian prej kohësh, gjë që është bërë pikërisht në rast se do të vinte kjo ditë kur palët dhe në këtë rast për mua, i pakuptueshëm është pozicioni i Kosovës dhe jo i Serbisë, palët nuk po merren vesh as se kush duhet ta shkruajë këtë tekst, jo më se çfarë duhet të ketë teksti. Natyrisht që ky është një dokument konfidencial që pa diskutim nuk pretendon të jetë zgjidhja ideale por ju siguroj që është një dokument i nivelit më të lartë ndërkombëtar që merr në konsideratë të gjitha arsyet për krijimin e Asociacionit dhe merr në konsideratë që Asociacioni është pjesë e organizimit të jetës në Kosovë, duke adresuar të gjitha rekomandimet e Gjykatës Kushtetuese të Kosovës”, ka thënë Rama.
Sipas Ramës, si Kosova ashtu edhe Serbia nuk e duan krijimin e Asociacionit, por ai beson se themelimi i saj është çelësi për të hapur përfundimisht derën e afirmimit ndërkombëtar të Kosovës.
“E kam ditur me kohë që nyja gordiane e dialogut do të ishte deri në fund Asociacioni i Komunave me shumicë serbe dhe bindja ime është se asnjëra nga palët nuk e do Asociacionin dhe do bëjë çmos që ta shtyjë atë në pafundësi, duke e mbajtur të hapur krizën. Në anën tjetër besoj çdo ditë e më shumë se krijimi i Asociacionit është çelësi për të hapur përfundimisht derën e afirmimit ndërkombëtar të Kosovës, njohjes së saj nga të gjithë, uljes së saj në OKB dhe të gjitha formumet ndërkombëtare dhe e njohjes së ndërsjellë me Serbinë”, ka thënë Rama në një konferencë për shtyp, përcjell teve1.info.