Këshilltari i zv/kryeministrit Besnik Bislimi, Klisman Kadiu, vlerëson se presidenti serb Vuçiq është kundërthënës në deklarimet e tij.
Sipas Kadiut, Vuçiq fillimisht tha se nuk ndikon te serbët në veri, e më pas emisari Escobar u shpreh se Vuçiq i premtoi se do të ndikojë që serbët të marrin pjesë në zgjedhjet në veri.
“Tash, a i kontrollon apo nuk i kontrollon? A ka ndikim apo nuk ka ndikim? Pse flet me kaq siguri per sjelljen e serbëve Vuçiq, kur sipas fjalëve të tij nuk i kontrollon ata? Ku e merr këtë guxim për të dhënë siguri veç një javë më vonë tek ndërkombëtarët?”, ka shkruar ai.
Sipas Kadiut, Vuçiq çuditërisht është i besueshëm vetëm për ndërkombëtarët.
“Presidentit të Serbisë po i intereson ruajtja e status quo-së, kaosi, e tentativat e panumërta për destabilizimin e Kosovës. Atij i pengon progresi i vendit tonë, i pengojnë marrëveshjet e mëhershme dhe të tashme që duhet t’i implementojë, i pengon shteti i Kosovës”, ka shkruar tutje ai.
