Qeveria ka miratuar projektligjin për ratifikimin e traktatit mes Kosovës dhe Danimarkës që lejon këtë të fundit të shfrytëzojë me qera qelitë e Kosovës, për t’i vendosur të burgosurit e saj.
Ministrja Haxhiu ka thënë se përmes këtij projektligji synohet fuqizimi i mëtejmë i sistemit të shërbimit korrektues të Kosovës.
“Qeveria, konkretisht Ministria e Drejtësisë ka zhvilluar negociatatat me Mbretërinë e Danimarkës dhe pas tyre është nënshkruar edhe traktati mes Kosovës dhe Danimarkës. Qëlimi është forcimi i mëtejshëm i marrëdhënieve ekzistuese të bashkëpunimit në mes të dyja vendeve duke e marrë parasysh zhvillimin pozitiv në sistemin e shërbimit korrektues të Kosovës dhe duke marrë parasysh që Kosova me anë të këtij bashkëpunimi do të ketë mundësinë që të fuqizojë më tej sistemin e shërbimit korrektues”, ka thënë Haxhiu.
Ajo ka shtuar se traktati rregullon çështjet që kanë të bëjnë me ekzekutimin e dënimeve daneze dhe mund të përfshijë edukimin, trajnimin dhe çështje të tjera.
“Traktati rregullon çështje që kanë të bëjnë me ekzekutimin e dënimeve daneze me burgim dhe përcakton kushtet e nevojshme përgjatë ekzekutimit të dënimeve daneze. Ky traktat përveç ekzekutimit të dënimeve daneze, mund të përfshijë në veçanti edukimin dhe trajnimin, shërbimin e praktikave dhe përvojave më të mira, fuqizimin e zbatimit të standardeve ndërkombëtare në shërbimet korrektuese, po ashtu paraburgimin dhe mbështetjen dhe bashkëpunimin më të gjerë lidhur me mekanizmat e shërbimit korrektues”, ka shtuar ajo
Traktati më tutje duhet të votohet në Kuvend.
