Drejtori i Institutit EPIK Demush Shasha, thotë se situata në veri të vendit tash e më shumë se një javë ka qenë e parashikueshme.
Ai në emisionin “ReSpublika” në Tëvë1, madje tha se komuniteti perëndimor nuk ka dashur ta parandalojë situatën e përshkallëzuar në veri, pasi sipas tij, Shtetet e Bashkuara të Amerikës dhe Bashkimi Evropian janë të interesuar që ti japin fund dialogut mes Kosovës dhe Serbisë.
“Gjithçka çfarë ka ndodhur këto një javë ditë në veri në fakt më shumë se një javë ditë, ka qenë jashtëzakonisht e parashikueshme. Pra kemi qenë në kurs kolizioni shumë të çartë nga vet fakti që komuniteti perendimor nuk ka ndërhyrë për të parandalu këtë situatë tregon nivelin e ulët të interesimit dhe përkushtimit të nivelit të lartë politik, flas të Shteteve të Bashkuara të Amerikës por edhe Bashkimit Evropian për ti dhënë fund dialogut Kosovë – Serbi”, tha ai.
Tutje Shasha theksoi se kur kryeministri Kurti dhe presidenti Vuçiq do e kuptojnë mosinteresimin e komunitetit ndërkombëtarë, ata do e keqpërdorin situatën për interesa të tyre puro politike.
“Dhe kur kemi në tavolinë dy le të themi nën thonjëza “ujqit politik”, sikur që janë Vuçiq dhe Kurti ata shumë shpejtë dhe shumë lehtë do e vërejnë tek bashkëbiseduesit e tyre ndërkombëtare dhe te fasilituesit këtë mungesë të interesimit dhe përkushtimit. Dhe momentin kur ata vërejnë këtë mungesë përkushtimi të komunitetit ndërkombëtrarë të interesimit, atëherë ata do e keqpërdorin një situatë të tillë do e manipulojnë puro për interesat e tyre politike, zgjedhore dhe strikt të brendshme nacionale për përfitime politike”, shtoi ai./teve1.info./