Para orës nëntë e tridhjetë të mërkurën, arritën në Kuvendin e Kosovës.
E deputetëve të Partisë Demokratike të Kosovës, iu bashkua edhe kryetari, Bedri Hamza.
Kështu, për më shumë se një orë e mbajtën mbledhjen e grupit parlamentar.
E më të përfunduar mbledhja, dy nga deputetët u nisën drejt Komisionit për Legjislacion.
Por para se të hynte në sallë, deputeti i PDK-së, Përparim Gruda, tregoi se çka diskutuan në mbledhje.
Pas kësaj, filloi edhe mbledhja e Komisionit për Legjislacion.
Por, mospërfshirja në rend të ditës e projektligjit për plotësimin e Ligjit për Dhomat e Specializuara, nxiti reagim të ashpër nga dy anëtarët e PDK-së.
“Dhe për mua është krejtësisht joserioze që të ftohet komisioni për legjislacion dhe të trajtojmë sot gjashtë pika të rendit të ditës e të mos jetë i përfshirë ligji për Dhomat e Specializuara. PDK konsideron që në këto rrethana nuk ka prioritet më të madh. Ne bashkë me zotëri Grudën nuk do të qëndrojmë në mbledhjen e komisionit, dhe pas diskutimit të zotëri Gruda do të lëshojmë mbledhjen”, ka thënë deputetja e PDK-së, Blerta Deliu Kodra.
“Ne nuk mund të lejojmë që tre apo katër gjyqtarë atje në Hagë të na e përlyejnë historinë kështu, dhe ne si ligjvënës të mos marrim asnjë akt”, u shpreh Gruda.
Me ta u bashkua edhe Aleanca.
“Në qoftë se nuk ka vullnet me ardhur ligji i cili është sot në Ministrinë e Drejtësisë në Kuvendin e Kosovës me thënë është qëndrim politik. Në qoftë se ka analizë, vlerësim që ky ligj nuk është boll. Të flasim këto 6 ditë veç pak sinqertë. Ta dimë pse s’po vjen ligji”, ka thënë Tahiri.
E të tre deputetët që reaguan, e lëshuan sallën.
Ndërsa më pas, PDK njoftoi se nuk merr pjesë në komisione pa u sjellë ligji për Dhomat e Specializuara
“Në Komisionin për Legjislacion, të cilin sapo e lëshuam, duke e thënë qartësisht që nuk do të jemi në komisione pa u sjellë ligji për Dhomat e Specializuara, sot janë sjellë gjashtë projektligje me procedura të përshpejtuara. Dje deputetët i kanë marrë materialet për këto projektligje, ndërkohë pa mbërritur që të diskutohen, të trajtohen, gjashtë projektligje sillen në rend dite në ditën kur nevojë imediate do të duhej të ishte sjellja e ligjit për Dhomat e Specializuara”, u shpreh tutje Deliu Kodra.
Ndërkohë nga Vetëvendosje, thonë se PDK nuk është në pozitë për të vendosur kushtëzime.
“Nuk mund të kushtëzosh duke thënë votoje ligjin më pastaj ndalemi e bisedojmë për çështjen e presidentit është shumë e rëndësishme, për shumë arsyeje e sidomos për mënyrën se si ka me ecë Kosova tutje. Duhet me i lënë anash këto interesa personale, fatkeqësisht po duket e pamundur prej këtyre partive. PDK më së paku e ka luksin me bë kushtëzime të tilla”, theksoj Kryeziu Hyseni.
Ndryshe, mospajtimet e reja mes Vetëvendosjes dhe PDK-së, erdhën pas aktgjykimit dënues në Hagë për ish-krerët e UÇK-së.
