Në gjykatore nuk u paraqit.
Por, ish polici i Kosovës, Festim Ramadani, që akuzohet për vrasje të rëndë, u paraqit përmes video lidhjes.
Kjo është ndër rastet e rralla në Kosovë që një i akuzuar zgjedh formën elektronike për të dëgjuar verdiktin.
Në Gjykatën Themelore në Ferizaj, erdhën familjarët e të akuzuarit, si dhe familjarët e viktimës, Sadri Sadriu.
Ramadani u shpall fajtor dhe u dënua me 16 vite burgim.
“Të pandehurin, Festim Ramadani e gjykon me dënim me burg në kohëzgjatje prej 16 vitesh”, u shpreh kryetari i trupit gjykues, Ilir Bytyqi.
Gjatë shpalljes së aktgjykimit, kryetari i trupit gjykues tregoi se si kishte ndodhur krimi gjatë një dasme, në një mbrëmje të gushtit të vitit 2024.
“Më 16 gusht 2024, në ora 19:21, në parkingun e restorantit FronPalace, në fshatin Bibaj, komuna e Ferizaj, gjatë një ceremonie martesore, i pandehuri me dashje dhe me paramendim, me qëllim hakmarrjen, për motive të pretenduara familjare, të pabazuara dhe të pakonfirmuara juridikisht, në prani të disa personave, me armë zjarri automatike të zyrtarit policor, me qëllim privimin nga jeta me breshëri plumbash, shtie në drejtim të viktimës Sadri Sadriu”, ka thënë tutje kryetari i trupit gjykues, Ilir Bytyqi.
Një ditë më parë, Festim Ramadani, e pranoi fajësinë. Prandaj, edhe gjykimi u bë në një procedurë më të shpejtë.
Ndaj të akuzuarit tjetër, Jeton Misinit, i cili ngarkohet për veprën penale “dhënia e ndihmës në kryerjen e veprën penale”, procedura është veçuar.
