Komiteti Olimpik i Kosovës (KOK), ka reaguar ashpër ndaj mesazhit provokues dhe politik të tenistit nga Serbia, Novak Gjokoviq. Madje, KOK-u ka deponuar ankesë në Komitetin Olimpik Ndërkombtar (IOC) në lidhje me këtë çështje, ka njoftuar të martën.
Tenisti serb, ka vazhduar me provokimet e tij politike, pasi të hënën shkroi mesazh me propagandë pro-serbe “Kosova është zemra e Serbisë! Ndaleni dhunën” pas fitores në rundin e parë të Grand Slamit “French Open”. Ky veprim i Gjokoviqit është vlerësuar i papranueshëm ndaj KOK-ut, i cili ka kërkuar nga IOC-ja që të ndërmarrë masa ndaj tij.
“Gjokoviq promovoi sërish propagandën e nacionalistëve serbë dhe përdori platformën sportive për ta bërë këtë. Po ashtu, deklaratat e mëtejshme të bëra nga një personazh i tillë publik pa asnjë ndjenjë pendimi, rezultojnë drejtpërdrejt në ngritjen e nivelit të tensionit dhe dhunës mes dy vendeve, Kosovës dhe Serbisë”, thuhet në reagimin e KOK-ut.
Po ashtu, një kopje të këtij reagimi, KOK-u është kujdesur t’ia dërgojë edhe Federatës Ndërkombëtare të Tenisit.
Te KOK-u janë të shqetësuar me veprimin e Gjokoviqit dhe për këtë arsye kanë kërkuar reagime të ashpra, jo vetëm nga IOC-ja por edhe Federata ndërkombëtare e Tenisit. Madje, kësaj të fundit, i është kërkuar që ta hetojë këtë çështje dhe të hapë procedurë disiplinore kundër Gjokoviqit.
“I nderuari president, ajo që ndodhi në ‘French Open’, perceptohet si shkelje e parimeve sportive dhe e shpirtit olimpik, si një shkelje e Kartës Olimpike. Pavarësisht se Gjokoviq është një nga tenistët më të mirë, një sjellje e tillë e përsëritur nuk mund të tolerohet, pasi krijon një precedent të rrezikshëm që sporti mund të përdoret si një platformë për mesazhe politike, agjenda dhe propagandë. Unë me të vërtetë shpresoj që IOC të ngrit zërin në emër të sportit dhe të tregoj edhe një herë, siç e keni treguar gjithmonë, se sporti nuk mund të përdoret për mesazhe dhe agjenda politike dhe ju falënderoj paraprakisht për vëmendjen që do të rezervoni për këtë çështje”, shkruan në fund të reagimit të të KOK-ut.
Mesazhi i djeshëm i Gjokovoqit, nuk ishte i pari, pasi i njëjti kishte bërë deklarata të tilla politike në ngjarje të ndryshme të tenisit.
