Të shtunën në stadiumin “Ekrem Grajqevci” në Fushë-Kosovë, në duelin e fundit në shtëpi për këtë sezon, barazuan 2:2 me Ramiz Sadikun.
Ishte ndeshje e xhiros së 26-të e rangut të dytë të futbollit të Kosovës.
Pas ndeshjes e festoi titullin kampion në Ligën e Parë – Grupi B. Festa ishte e madhe në fushë e në tribuna.
Burim Fejzullahu kaloi Fushë Kosovën në epërsi prej një goli në minutën e 25-të me një gol të bukur.
Më pas, Ramiz Sadiku u kthye në lojë.
Dient Isufi në minutën e 59-të i barazoi shifrat me gol të bukur, njësoj siç bëri edhe Eurent Krasniqi që finalizoi aksionin e mirë të ndërtuar në minutën e 67-të.
Por Fushë-Kosova nuk u dorëzua dhe barazoi shifrat me Valgjin Bllacën në minutën e 84-t.
Fushë Kosova pas 26 ndeshjeve ka grumbulluar 56 pikë në total, kur ka mbetur edhe një xhiro deri në fund të kampionatit.
Ulpiana në pozitën e dytë ka 50 pikë.
Ndërkohë, Ramiz Sadiku në vendin e gjashtë ka 27 pikë gjithsej, pas 26 ndeshjeve të luajtura.
Për herë të fundit, Fushë-Kosova në Superligë ishte në edicionin 2013/14.
Në xhiron e fundit të Ligës së Parë – Grupi B, Fushë-Kosova luan në udhëtim tek Arbëria, ndërsa Ramiz Sadiku në shtëpi e pret Ulpianën.
© KOHA.
