16:50 – Zyrtare, Drenica bie nga Superliga e Kosovës për herë të parë në histori
Drenica është skuadra e parë e Superligës së Kosovës që edhe zyrtarisht nga edicioni tjetër, për herë të parë do të bëj gara në rangun e dytë të futbollit kosovar.
Drenica me disfatën e pësuar në udhëtim te Trepça ’89 të shtunën me rezultatin 3:1, ka humbur gjasat për ta zënë të paktën vendin e barazhit, që është një mundësi shtesë për t’i shpëtuar mbijetesës. Ishte ndeshje që i takoi xhiros së 33-të të Superligës së Kosovës.
Deri në fund të kampanjës së sivjetme të Superligës, Drenica do t’i zhvillojë edhe tri ndeshje, dhe janë në lojë edhe nëntë pikë. “Kuqezinjtë” për herën e parë në histori të klubit do të bëjnë gara në rangun e dytë të futbollit të Kosovës. Rënia e Drenicës ka ardhur si pasojë e serisë së 10-të disfatave të njëpasnjëshme.
Drenica këtë të shtunë në “Riza Lushta” pësoi humbje me rezultat 3:1 nga Trepça ’89. Ekipi mitrovicas epërsinë e hershme ndaj kuqezinjëve e morën me golin e Egzon Fazliut në minutën e 3′ të ndeshjes, derisa Fatty në 30′ dyfshoi epërsinë. I njëjti futbollist shënoi edhe në 44′, por goli i tij u anulua pasi Sekiraqa ishte në pozitë jashtëloje. Me epërsi prej dy golave, ’89-shi shkoi në pushim të pjesës së parë.
Ndërkaq me të nisur pjesa e dytë, kapiteni Rilind Nimani me një parabolë shënoi për 3:0, teksa vetëm tre minuta me pas ekipi drenicas arriti golin e nderit në këtë ndeshje me Osman Mëziun.
Trepça ’89 tani ka 37 pikë në vendin e tetë, kurse Drenica mbetet e fundit me 23 pikë dhe është përshendetur nga Superliga përherë të parë nga paslufta.
15:35 – Trepça ’89 e qetë shkon në pushim ndaj Drenicës
Trepça ’89 ka shkuar në pushim të pjesës së parë me epërsi të dyfishtë ndaj Drenicës. Ekipi nga Mitrovica po e mposht 2:0 kuqezinjtë në ndeshjen që i takon xhiros së 33 në Superligën e Kosovës në futboll.
Epërsi e hershme e Trepçës ’89 ndaj Drenicës, e ka shënuar Egzon Fazliu në minutën e tretë, derisa Madi Karamo Fatty ka dyfishuar epërsinë në minutën e 30. Fatty shënoi edhe në 44′, por goli i tij u anulua, pasi Sekiraqa ishte në pozitë jashtëloje.
