Ministri i Mbrojtjes, Armend Mehaj ka takuar homologun e tij kroat, Mario Banozic, me ç’rast të dy ministrat kanë nënshkruar Marrëveshjen Kornizë për Bashkëpunim në Fushën e Mbrojtjes. Takimi dhe nënshkrimi ndodhën gjatë punimeve të konferencës tradicionale të Mbrojtjes dhe Hapësirës Ajrore të Detit Adriatik (ASDA).
Siç thuhet në një njoftim, të dy ministrat diskutuan për shumë çështje relevante me situatën aktuale gjeopolitike, duke përfshirë ndikimin rus në Ballkan, domosdoshmërinë e unitetit përballë tendencës për destabilizim dhe cenim të vlerave demokratike, investimin e përbashkët në fusha strategjike sa i përket sigurisë dhe mbrojtjes, me qëllim garantimin e paqes dhe stabilitetit në rajon dhe më gjerë.
Ndërsa ministri kroat njoftohet se shprehu vlerësimin e tij për hapat e ndërmarrë nga ana e Kosovës për zhvillimin e ushtrisë, e po ashtu faktin e ngritjes së kapaciteteve ushtarake përmes blerjeve direkte, shtet më shtet, në përputhje me standardet e NATO-s..
“Ndër tjera, Ministri Banozic garantoi mbështetje të pakursyer nga ana e Kroacisë për Kosovën dhe të ardhmen tonë evropiane”, thuhet në komunikatë.