Ministrja e Drejtësisë, Albulena Haxhiu, duke iu përgjigjur deklaratave të deputetes së Partisë Demokratike të Kosovës, Eliza Hoxha, ka thënë se nga ajo parti ka pasur përpjekje të amnistimit të krimeve që Serbia i ka bërë në Kosovë.
Haxhiu ka thënë se ka pasur përpjekje, madje serioze për t’i amnistuar krimet që janë bërë gjatë luftës në Kosovë.
“Po, juridikisht krimet e luftës nuk amnistohen, nuk parashkruhen, por politikisht ka pasur përpjekje serioze për t’i amnistuar krimet e luftës”, ka thënë ministrja gjatë fjalimit të saj në Kuvendin e Kosovës.
Sipas Haxhiut, Serbia është shfajësuar në kohën e qeverisë së Partisë Demokratike të Kosovës, ndërsa tash për herë të parë Serbia pranon krimet që i ka bërë në Kosovë.
“Prandaj, Serbia është shfajësuar në kohën kur ju keni qeverisur, ndërsa tani Serbia për herë të parë në një dokument zyrtar pranon krimet që ka bërë në Kosovë gjatë periudhës së luftës, krimet ndaj popullit të Kosovës, krimet e luftës, aktet e gjenocidit, krimet kundër njerëzimit”, tha ajo.
Haxhiu, lëshoi edhe një audio, ku ish-ministri i Drejtësisë, Hajredin Kuçi,flet për krimet e luftës, ku dëgjohet duke thënë: “Për krime lufte s’e kisha dënuar asnjë njeri. Kisha bë amnisti. Sepse për mua çmimi më i madh për luftën është liria dhe pavarësia”.
Tutje, ministrja tha se të njëjtën qasje “e ka ndjekë edhe Hashim Thaçi”.
“Pra, Hajredin Kuçi, ish-ministri i Drejtësisë flet për amnistimin e krimeve të luftës. Këtë qasje e ka ndjekë Qeveria e udhëhequr nga PDK-ja. Këtë qasje e ka ndjekë edhe Hashim Thaçi sa e ka udhëhequr dialogun me Serbinë”, tha ajo.
Haxhiu tha se me miratimin e deklaratës për personat e zhdukur, në takimin ndërmjet kryeministrit të Kosovës, Albin Kurti dhe presidentit serb, Aleksander Vuçiq, për herë të parë çështja e personave të zhdukur po trajtohet me prioritet.
Përfund, ajo ka thënë se me atë deklaratë, Serbia pranon krimet shtetërore mbi popullin e Kosovës, mbi qytetarët e vendit.
Ndërsa, deputetja Eliza Hoxha ka thënë se çuditet me komoditetin e ministres derisa ajo flet.
“Ma gjej diku në Konventa ndërkombëtare që gjendet diku termi ‘forcibly disappeared’. Po ta rikujtoj që Organizata ‘Integra’ ka nisur iniciativën për drejtësi tranzicionale në kohën e ish-presidentit Hashim Thaçi dhe presidentja Osmani nuk është marrë me të. Tash po merreni ju”, ka thënë Hoxha. /teve1.info/
