Deputeti i LDK-së, Driton Selmanaj ka thënë se është i shqetësuar me mënyrës e qasjes dhe veprimet e kryeministrit Kurti në dialog, të cilat i ka quajtur të pamatura
Sipas Selmanajt, me Deklaratën për të Pagjeturit, relacioni mes agresorit dhe viktimës është relativizuar deri në mosdallim, pasi që sipas tij, përgjegjësi për të pagjeturit tashmë kanë edhe Kosova edhe Serbia.
“Në Deklaratën për të Pagjeturit të miratuar më 2 maj, relacioni mes agresorit dhe viktimës është relativizuar deri në mosdallim. Fatkeqëisht Kurti ka barazuar dhe përgjegjësitë institucionale mes dy shteteve për zbardhjen e fatit të të pagjeturve, madje edhe për periudhat kur nuk ka ekzistuar fare shteti i Kosovës. Është gabim fatal që shteti i Kosovës të mbajë përgjegjësi për periudhën para vitit 2008. Me rezolutën 1244 OKB ka qenë autoriteti i vetëm që mban përgjegjësi për çdo gjë që ka ndodhur në Kosovë”, ka thënë Selmanaj.
Ai ka shtuar se shteti i Kosovës nuk mund të konsiderohet përgjegjëse për të zhdukurit deri në dhjetor 2000, pasi është bërë shtet më 17 shkurt 2008.
“Shteti i Kosovës është krijuar më 17 shkurt 2008. Si është e mundur që të nënshkruash diçka ku thuhet se edhe institucionalisht ke prova materiale për një luftë kur ti nuk ke ekzistu fare si entitet shtetëror. Kjo sa është e pakuptimtë është poaq edhe e dëmshme. Serbia ka bërë luftë në Kosovë në territorin e Kosovës me një udhëheqje fashiste të mirëstrukturuar e që ka kryer krime lufte në Kosovë”, ka deklaruar Selmanaj.
Tutje ai ka shtuar se me këtë deklaratë Qeveria po e bën fajtore UÇK-në për zhdukjen e serbëve në territorin e Kosovës.
“Dhe kjo është tepër e rëndë që njerëzit e Kosovës, të cilët kishin një strukturë të armatosur guerile, e të cilën Qeveria aktuale tash po e bën përgjegjëse për zhdukjen e secilit serb në territorin e Kosovës. Çështja tjetër që ngre shqetësim është që me dakordimin e deklaratës për të zhdukurit Kosova i ka mundësuar Serbisë që të heq përgjegjësinë penale juridike-shtetërore për zhdukjet e dhunshme, sipas nenit 2 të Konventës së OKB-së”, ka deklaruar Selmanaj, përcjell teve1.info.
