Drejtori i Fondacionit “Hasan Prishtina”, Mehmet Prishtina nuk mendon se do të pranohet ideja që Universitetit të Prishtinës t’i hiqet emri “Hasan Prishtina”.
Ai thotë se kjo ide duhet të minohet që në fillim e të kundërshtohet nga të gjithë ata që e vlerësojnë figurën e Hasan Prishtinës.
“Nuk mendoj dhe as nuk dua me besu që mund të ketë ndonjë efekt kundraproduktiv apo që të pranohet kjo si ide. Por kjo ide duhet në start të minohet, dhe të gjithë ata që e vlerësojnë figurën dhe që e duan arsimin dhe që e duan një përparim dhe zhvillim akademik, duhet ta kundërshtojnë këtë sepse problemet i kemi diku tjetër, dhe jo aty”, deklaroi ai në “Info Nata” në Tëvë 1.
Tutje, ai shtoi se pret reagime nga grupet parlamentare, si dhe nga kryeministri Albin Kurti.
“Unë pres ditëve në vijim reagime edhe nga grupe të ndryshme paralmentare, por edhe nga institucionet, nga Ministria e Arsimit, nga vetë kryeministri sigurisht. Dhe jam i bindur sepse ne gjendemi momentalisht në një fazë të negociatave dhe aty po e lë fajin. Por mirë është që mos të na ik vëmendja nga temat të tilla”, u shpreh Prishtina.
Dje është propozuar largimi i emrit “Hasan Prishtina” nga Universiteti i Prishtinës, përmes ndryshimeve statutare të cilat janë në diskutim.
Kjo pasi siç thuhet, vendosja e emrit u bë shumë vite pas themelimit të Universitetit. /Teve1.info/