Krahas vendimit të Parlamentit Evropian për liberalizimin e vizave, analistja Arta Tahiri-Beqa, deklaroi se Kosova brenda vitit mund të bëhet edhe anëtare e Këshillit të Evropës.
Derisa theksoi që Kosova ka plotësuar kriteret për tu bërë pjesë e KiE-së, Tahiri-Beqa tha se patjetër ky është një momentum që duhet shfrytëzuar, përcjell teve1.info.
“Besoj që shumë shpejt do të jetë edhe pranimi në Këshillin e Evropës. Kjo sepse në KiE duhet vetëm dy të tretat e asamblesë pjesëmarrëse. Kosova tani e ka momentumin që mund të bëhet anëtare e Këshillit të Evropës. Ndërkohë, për organizatat tjera besoj që në këtë vit, nuk mund të flasim. Andaj, mendoj që brenda këtij viti Kosova mund të bëhet pjesë e KiE. Kriteret i kemi plotësuar, parimisht i kemi kaluar”, potencoi Tahiri-Beqa në emisionin “Këndi i Debatit” në Tëvë1.
Ndërkaq, sa i përket faktit që qytetarët e Kosovës do të kenë mundësi të udhëtojnë lirshëm në zonën Schengen, që prej datës 1 janar 2024, Tahiri-Beqa tha se është mirë të njoftohen qytetarët që liberalizim i vizave nuk do të thotë punësim i menjëhershëm në shtetet e Bashkimit Evropian./teve1.info/.
