Pas 12 vjet pritje, procesi i liberalizimit të vizave të Kosovës do të marrë fund më 1 janar të vitit 2014.
Duke qenë të izoluar si të vetmit në rajon qytetarët e Kosovës në numër të madh kanë lëshuar Kosovën që nga shpallja e pavarësisë më 2018.
Por, se a do ta ndalë liberalizimi i vizave ikjen e qytetarëve nga vendi, analistët në emision “ kanë mendime të ndryshme.
Politologu, Driton Arifi duke parë nevojën për fuqi punëtore të vendeve të BE-së, thotë se liberalizimi i vizave nuk do ta ndalë ikjen e qytetarëve edhe pse sipas tij do të ketë një efekt në ngadalësim.
Madje ai thotë se nga Kosova nuk po ikin vetë njerëzit e papunë, por edhe profesionistë të fushave të ndryshme.
“Liberalizimi i vizave nuk do të thotë që do të ndal migracionin, mund të zbus por jo të ndalë.Prej Kosovës nuk po ikin vetëm njerëzit që janë të papunë”, ka thënë ai në “Këndin e Debatit”.
Edhe analistja Arta Tahiri –Beqa, mendon se kërkesa për fuqi punëtore sidomos në Gjermani e Zvicër do të ndikojë që qytetarët e Kosovës të kërkojnë për një jetë më të mirë jashtë vendit.
“Kush do që është gëzuar sot për vizat është gëzuar për me ikë në Evropë”, ka thënë ajo.
Ndërsa, analisti Arton Demhasaj mendon se ikja e qytetarëve do të jetë më e vogël.
Sipas tij, qytetarët pasi do ta kenë mundësinë të dalin në vendet e Evropës do ta shohin se edhe atje nuk është ashtu siç mendojnë.
“Ka qenë një pritje e qytetarëve të Kosovës se megjithatë paratë në vendet e BE-së fitohen lehtë dhe po ta kishin pas mundësinë me pas se nuk fitohen lehtë ndoshta do të kishin reflektu dhe do të ishin kthyer me punu diçka”, ka thënë Demhasaj
Ai ka marrë edhe një shembull me dëshirën e qytetarëve të Kosovës dhe atyre të Bosnjës për tu kthyer në vendet e tyre, ku në Kosovë dëshira për tu kthyer ka qenë shumë më e madhe.
“Ka pasur një situatë në Bosnje kur është nënshkruar marrëveshja e Dejtonit ke pasur një rezistencë të madhe të këtyre qytetarëve me u kthy. Në rastin e Kosovës në momentin kur është nënshkruar marrëveshja e Kumanovës dhe kanë fillu forcat ndërkombëtare me u instalu në Kosovë ka pasur vrull të madhe të njerëzve me u kthy në Kosovë jo vetëm nga ata që kanë qenë në Shqipëri dhe Maqedoni madje edhe nga vendet Bashkimit Evropian”, ka thënë Demhasaj
