Presidenti i Shqipërisë, Bajram Begaj ka vlerësuar rolin e ShBA-së në dialogun Kosovë-Serbi.
Ai këto komente i ka bërë pas takimit që ka zhvilluar me Zëvendës Ndihmës Sekretarin amerikan të Shtetit njëkohësisht dhe të dërguarin e posaçëm për Ballkanin Perëndimor, Gabriel Escobar.
Begaj në Facebook ka shkruar se në këtë takim u rikonfirmuan pozicionet e palëkundura të dy vendeve për të ardhmen euroatlantike të Ballkanit Perëndimor.
“Vlerësova partneritetin strategjik mes Shqipërisë dhe ShBA-së si dhe shpreha mirënjohjen për kontributin e SHBA-së në rritjen e kapaciteteve kibernetike të Shqipërisë. Nënvizova rolin e paçmuar që Shtetet e Bashkuara dhe Escobar kanë luajtur në procesin e negociatave Kosovë-Serbi”, ka shkruar Begaj, përcjell teve1.info.
Escobar po qëndron për vizitë zyrtare në Shqipëri, ku pritet të takohet edhe me kryeministrin e Shqipërisë dhe përfaqësues të opozitës./teve1.info/