Lotët nuk mund të i mbajë, sa herë që kujton ditën kur u nisë për në Bllacë.
Lumnije Krelani Jakupi ishte një nga mijëra refugjatët shqiptarë që u detyrua të marrë rrugën drejt Maqedonisë e të braktiste çdo gjë që kishte në Kosovë.
Ajo për Tëvë 1 ka rrëfyer përjetimet e saj në vendin ku pa tmerrin më sy.
“Kur erdhëm në Bllacë e ditëm që kemi shpëtuar pak shumë prej okupatori kur kemi ardhur në Bllacë ishte baltë, pa hëngër pa pijë fëmija, na thoshin është një lum aty, e ne nuk dinim se ku ishte lum aty afër apo në këmbë të tona. Ne nuk kishim mundësi të largoheshim as për nevoja tona sepse humbte kontaktim”, thotë Krelani – Jakupi
Edhe pas 24 viteve, Krelani Jakupi ende kujton fytyra e serbëve gjatë eksodit të shqiptarëve.
“Kurrë nuk me heket ajo prej mendjesh tu leshu na vendin tonë, ata ( serbët) na ngritshin tre gishtat, punofshin tokat tona dhe qeshin me neve”, rrëfen ajo.
Fytyra të lodhura të grave e fëmijë të uritur janë disa nga pamjet e asaj ngjarje.
Por ishte shpresa ajo që i mbante të gjallë ata.
“Ishte një tmerr i paparë të them të drejtën por gjithmonë na mbante shpresa se do të shpëtojmë.Shpresa mes vdekjes ose mes errësirës që do ta gjejmë një dritë”, thotë Rudi Berisha.
E në përvjetorin e 24, Asllan Krasniqi, nxorri nga arkivi i tij për herë të parë fotografit të reja që dëshmojnë vuajtjet e shqiptarëve jashtë kufirit të Kosovës.
“Këto janë fotografi të Bllacës jashtë Kosovës, ku këta persona pritshin më orë e më orë për tu vendosur këtu kam ardhur direkt, janë 24 fotografi për nderë të 24 fotografive”, u shpreh Krasniqi.
Llogaritet se rreth 440 mijë refugjatë shqiptarë të dëbuar nga forcat serbe, pas nisjes së bombardimeve të NATO-s, kanë kaluar nëpër Kampin e Bllacës.
Kronika e realizuar nga gazetarja Doresa Geci