Lidhja Demokratike e Kosovës e ka kritikuar qeverinë e Albin Kurtit se për shkak të paaftësisë së qeverisjes po i shkakton dëme qytetarëve, raporton teve1.info
Përmes një reagimi publik në Facebook, LDK ka shkruar se tash e 9 muaj është në remont blloku A5 i Termocentralit Kosova A, derisa për të mbuluar zbrazëtirën e tij, Kosova po paguan çdo ditë rreth 1 milion euro import të rrymës.
Sipas LDK-së, nëse nuk do të ishte zvarritur remonti i këtij blloku, nuk do të rritej edhe çmimi i rrymës.
“Blloku A5 i Termocentralit Kosova A prodhon mjaftueshëm energji elektrike për të mbuluar rreth 13% të nevojave për Kosovë.
Ky bllok është lënë jashtë funksioni qe 9 muaj me radhë.
Për çdo ditë që kemi blerë energji elektrike për të mbushur zbrazëtirën që do të mund ta mbulonte blloku A5, Kosova ka paguar rreth 1 milion euro import ditor.
Nëse nuk do të ishte zvarritur remonti i këtij blloku nga pushteti, nuk do të kishte ngritje të çmimit të rrymës prej 15%.
Kjo qeveri është e paaftë! Kjo paaftësi po na kushton shtrenjtë!”, thuhet në reagimin e LDK-së.
Çmimi i rrymës në Kosovë është rritur nga 1 prilli 2023 për 15 për qind më shumë derisa kjo rritje e çmimit do të zgjas deri në fund të muajit mars të vitit të ardhshëm.
