Lavdim Makshana, hulumtues në Institutin e Kosovës për Drejtësi, tha se mbrojtjet e ish-krerëve të UÇK-së janë shumë të koordinuar mes vete.
Duke folur për paraqitjen e mbrojtjes Hashim Thaçit, Kadri Veselit, Rexhep Selimit dhe Jakup Krasniqit, Makshana vlerësoi që mbrojtja e të akuzuarve sot ishte në nivelin më profesional të mundshëm.
“Unë besoj që mbrojtja e katër të akuzuarve, ka një strategji, pra nuk janë të pa koordinuar, përkundrazi janë shumë të koordinuar. Ne e kemi parë që strategjia e Thaçit ka qenë që “ne nuk i mohojmë krimet të cilat kanë ndodhur dhe janë përfshirë në aktakuzë, por ne do të tregojmë që nuk kemi të bëjmë asgjë me ato krime”. Prandaj, besoj që ka një strategji të mbrojtjes, ajo u pa sot në momentin kur mbrojtësit e të akuzuarve, kanë dhënë argumente se pse nuk ka ekzistuar ‘ndërmarrja e përbashkët kriminale’. Mbrojtja e të akuzuarve, sot ishte në nivelin më profesional të mundshëm”, deklaroi Makshana në emisionin “Ditari” në Tëvë1.
I pyetur se a janë videoincizimet prova të mjaftueshme të mbrojtjes, Makshana tha se të gjitha këto do të vërtetohen gjatë shqyrtimit gjyqësor.
“Pra, do të thirren dëshmitarë të ndryshëm, do të ketë ekspert lidhur me ekzaminimin e të gjitha provave, për shkak se në rastin e Veselit, e pamë që përmendi prejardhjen e provave. Nëse Prokuroria mund ta ketë një provë shumë të rëndësishme për ta, duhet të dihet se nga ka ardhur ajo provë, kush e ka shkruar atë dokument, relevanca e tij, aspektin kohor dhe për çfarë është lëshuar”, theksoi tutje Makshana.
Megjithatë sipas tij, Prokuroria do ta ketë shumë të vështirë t’i vërtetojë të gjitha këto pretendime që i ka paraqitur.
“E pamë që edhe ana tjetër, shumë më e fortë se Prokuroria, është duke e përfaqësuar rastin”, potencoi ai.
Është mbyllur seanca e sotme gjyqësore ndaj ish-krerëve të UÇK-së në Gjykatën Speciale në Hagë.
Kryetari i trupit gjykues, Charles Smith tha se seanca tjetër do të mbahet nesër në orën 09:00, në të cilën mbrojtja e Jakup Krasniqit do ta bëjë deklaratën hyrëse në gjykim./teve1.info/.
