Organizata “QIKA” dhe Rrjeti i Grupit të Grave të Kosovës, kanë ka mbajtur një aksion simbolik para tri institucioneve: Qeverisë së Kosovës, Prokurorisë së Shtetit dhe Policisë së Kosovës.
Arsyeja e këtij aksioni ishte vendimi i Gjykatës Kushtetuese, që kishte konstatuar se institucionet kanë dështuar ta trajtojnë rastin e së ndjerës Sebahate Morina.
Adelina Berisha nga Rrjeti i Grave të Kosovës, tha se në këtë aksion kanë kërkuar përgjegjësi për dështimin e këtij rasti.
“Aksioni i sotëm është sepse ne e kemi parë që Gjykata Kushtetuese ka vendosur për disa shkelje që janë bërë nga institucionet tona në trajtimin e rastit të së ndjerës Sebahate Morinës. Kemi dalë për me bë thirrje të gjitha institucioneve që kanë përgjegjësi që menjëherë të marrin masat e duhura ndaj zyrtarëve që kanë dështuar ta mbrojnë të ndjerën”, tha ajo.
Më 14 mars 2021, Sebahatja ishte rrugës për në vendin e saj të punës, por pak metra pa mbërritur, u vra nga ish-bashkëshorti i cili, sipas raporteve zyrtare, e kishte rrahur e keqtrajtuar më parë.
Gjykata Kushtetuese e Kosovës kishte konstatuar më 22 mars të këtij viti se shteti ‘ia shkeli të drejtën për jetë’ Sebahate Morinës, e cila u vra nga ish-bashkëshorti më 14 mars 2021 në Prishtinë.
Dhjetë ditë para se Sebahatja të vritej, sipas raportit të Instituti i Kosovës për Drejtësi, njëra nga vajzat e saj raportoi në polici dhunën që po ushtrohej ndaj nënës së saj. Ish-bashkëshorti e kishte sulmuar Sebahaten sërish fizikisht.
Policia ndërmori masa hetimore. Intervistoi Sebahaten e cila konfirmoi se ishte viktimë e dhunës fizike. Ish-bashkëshorti i saj u intervistua po ashtu dhe mohoi sulmin. Sebahatja u ftua të intervistohej sërish një ditë pas, më 4 mars. Policia thotë se nuk u paraqit në stacion policor.
E, për dhjetë ditë të tjera, as policia e as prokuroria nuk ndërmori asnjë masë.
Në ditën e 11-të ajo u vra./EO/