Me shprehjet, “Autizmi është veçanti, nuk është uniformë”, “Fëmijët me autizëm nuk ju injorojnë, ata presin të hyni në botën e tyre”, “Autizimi thërret: Bëjeni Ligjin për Gjithëpërfshirje”, fëmijët bashkë me kryeministrin e vendit, Albin Kurti, përfaqësues të shoqatës “Autizmi” dhe përfaqësues nga Komuna e Prishtinës, sot dekoruan pemën afër qeverisë, ku u shënua edhe Dita Ndërkombëtare e Vetëdijësimit për Çrregullimin e Spektrit të Autizmit.
Kryeministri Albin Kurti u zotua se do të punojnë më shumë për mbrojtjen, promovimin dhe jetësimin e të drejtave të njeriut në përgjithësi.
“Ne sot po e organizojmë dhe zotohemi për përkushtimin e Qeverisë së Republikës së Kosovës për përmbushjen e të gjitha obligimeve tona për mbrojtjen, për promovimin dhe jetësimin e të drejtave të njeriut në përgjithësi, e në veçanti për respektimin e të drejtave të personave me aftësi të kufizuara apo me nevoja të veçanta”, tha kryeministri Kurti.
Kryeministri ka thënë se në vitin e kaluar janë punësuar 239 persona me aftësi të veçanta, 120 gra dhe 119 burra, përmes masës 1.6 të Pakos së Ringjalljes Ekonomike.
“Më tej, kryeministri potencoi se Qeveria ka ndërmarrë iniciativa ligjore në mbështetje të personave me aftësi të kufizuara sikurse ai për Ligjin për Edukimin në fëmijërinë e hershme, që pritet që shumë shpejt të aprovohet edhe në Kuvendin e Republikës, si dhe së fundmi edhe propozimin për amandamentimin e Kushtetutës së Kosovës, për përfshirjen e Konventës së të Drejtave të Personave me Aftësi të Kufizuara në nenin 22 të Kushtetutës së Republikës së Kosovës”, thuhet në komunikatë për media.
“Duhet të punojmë bashkërisht edhe si institucione dhe si shoqëri për krijimin e kushteve sa më të mira për personat me aftësi të kufizuara dhe në këtë mënyrë 2 prilli të mos jetë vetëm dita botërore e autizmit, por ta shndërrojmë në ditë të përditshme të angazhimit dhe të përkushtimit tonë për personat me autizëm që janë fëmijë të të gjithë neve e jo vetëm të familjeve të tyre”, ka thënë Kurti.
Ndërsa, kryetari i Prishtinës, Përparim Rama si dhe kryetari i Shoqatës për Autizëm, Cen Krasniqi kanë thënë se institucionet qeveritare duhet të bëjnë më shumë për fëmijët me autizëm.
