Një baba rus i cili e kundërshtoi haptazi luftën që po bën vendi i tij në Ukrainë u dënua me dy vjet burg nga një gjykatë ruse pasi u gjetën edhe vizatime pro paqeje të vajzës së tij 13- vjeçare.
Vizatimet e 13- vjeçares të cilat bëjnë thirrje për ndaljen e luftës të cilin e nisi shteti i saj rus në Ukrainë, e dërguan atë në jetimore dhe babanë e saj në sallën e gjyqit.
Babai, Alexei Moskalyov, u dënua nga një gjykatë ruse me dy vjet burg për vizatimet e të bijës, për një sërë postimesh në rrjete sociale në lidhje me pushtimin e Ukrainës nga Moska si dhe për diskreditimin e përsëritur të ushtrisë ruse.
Avokati i tij, Vladimir Biliyenko e konsideron të padrejtë dhe të paligjshëm vendimin e gjykatës.
“Gjyqtari dha dënimin që kërkoi prokurori. Vendimi është absolutisht i padrejtë sepse nuk ka asnjë provë të fajësisë së tij”, tha ai.
E aktivistja ruse për të drejtat e njeriut, Yelena Agafonova thotë se situata në të cilën është familja Moskalyov mund të përsëritet në çdo familje ruse.
“Kjo është monstruoze, kjo është e papranueshme. Ata njerëz që po e shikojnë tani këtë ngjarje dhe qeshin duhet ta dinë se kjo gjë mund të ndodhë edhe me fëmijët tuaj. Ndoshta fëmijët tuaj do të qeshin me diçka diku dhe do të jenë saktësisht në të njëjtën situatë në të cilën ndodhet tani kjo familje”, tha ajo.
Moskalyov, i cili u padit dhe u gjykua në qytetin e tij të lindjes Yefremov ka tërhequr vëmendjen ndërkombëtare dhe konsiderohet si një tregues se Kremlini po dënon çdo kritikë ndaj asaj që Moska e quan operacionin ushtarak në Ukrainë. /Tëvë 1/
