Për herë të tretë është shtyrë gjykimi për kërkim-marrje të ryshfetit nga ish-kryeshefi i KPM-së, Luan Latifi ndaj kompanisë “Telkos”.
Kësaj radhe për shkak të problemeve teknike, u pamundësua shqyrtimi gjyqësor. Kjo pasi që ishte paraparë që të mërkurën të dëgjoheshin disa audio-incizime.
“Zyrtarët e IT edhe pse ishin të njoftuar që nga seanca e kaluar që na duhej për të dëgjuar audio, na treguan se kjo nuk është e mundur. Kjo pasi që një zyrtar tjetër i ka larguar pajisjet nga salla, kështu që është e pamundur të fillojmë shqyrtimin gjyqësor. Në mungesë të kushteve në sallën e gjykimit, Gjykata merr aktvendim që shqyrtimi i sotëm nuk mbahet, dhe shtyhet për 3 maj në orën 09:00”- deklaroi kryetari i trupit gjykues, Alban Ajvazi.
Seanca paraprake e 17 marsit, u shtye me kërkesë të prokurores e cila po zëvendësonte prokuroren e rastit, pasi që ajo deklaroi se nuk kishte pasur kohë të përgatitej për rastin.
Aktakuza e ngritur më 15 shtator 2021, ngarkon Luan Latifin se në cilësinë e kryeshefit të Komisionit të Pavarur për Media (KPM) dhe Arben Bilalli, në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Telkos”.
Në aktakuzë thuhet se ky ryshfet ishte pranuar nga ana e të akuzuarve me qëllim që kompanisë “Telkos”, të mos i shqiptohet gjobë për shkak se e njëjta kishte bërë shkelje ligjore duke bërë shtrirje të rrjetit në disa vende për të cilat nuk e kishte njoftuar KPM-në.
Në seancën e mbajtur më datë 25 korrik 2022, Bilalli kishte pranuar fajësinë, dhe ishte veçuar procedura ndaj tij, ndërsa Latifi ishte deklaruar i pafajshëm./teve1.info./
