Aleksandër Çipa, kryetar i Unionit të Gazetarëve Shqiptarë në Shqipëri, ka thënë se sulmi me breshëri plumbash në Top Channel, ku humbi jetën edhe roja e kësaj shtëpie mediale, është sulmi më i rëndë ndaj institucionit të medias në Shqipëri që nga fundi i viteve të 90-ta.
“Kjo është një ngjarje e rëndë, e pazakontë në historinë e medias shqiptare të ndodhur në 32 vite, përjashto rastet e ndodhura kryesisht në vitet 97’ dhe 98’”, ka deklaruar Çipa.
Ai ka vënë në dukje se kohëve të fundit ka pasur një krizë në Shqipëri sa i përket besueshmërisë mediatike dhe sjellje problematike të pushtetit karshi gazetarëve.
“Fakti që në periudhën e fundit në raportet midis medias, botës së krimit, politikës së shtetit ka pasur episode të cilat duket sikur po evidentojnë përditë edhe më tepër një krizë që ka të bëjë me integritetin dhe raportimin e mediave të lira, por edhe me atë sjellje problematike që politika dhe në mënyrë më të veçantë pushteti kanë ndaj mediave dhe gazetarëve. Shto dhe faktin tjetër që në realitetin e sotëm mediatik të Shqipërisë, ka një situatë krizuale që lidhet me besueshmërinë mediatike dhe me rritjen e rasteve dhe akuzave të ndërsjella që kanë të bëjnë me gjobvënien, shantazhimin dhe intimidimin”, ka deklaruar Çipa në Info Nata në Tëvë 1.
“Të gjitha këto janë pjesë e këtij konteksti që e bëjnë edhe më të jehonshme ngjarjen tronditëse të goditjes me breshëri nga një grup kriminal mbi institucionin e medias private, por edhe njëkohësisht në media me licencë kombëtare si Top Channel”, ka thënë gazetari Çipa.
