Besnik Llumnica, imam në xhaminë e Bardhoshit, bëri thirrje që prindërit të shtojnë kujdesin ndaj fëmijëve të tyre.
Duke folur për rëndësinë e edukimit të fëmijëve dhe përgatitjen e tyre për agjërim, Llumnica tha se kur fëmijët mbushin 10 vjet obligohen të falin namaz, derisa shtoi që në periudhën e parë 5-vjeçare, ata ndikohen më së shumti nga sjelljet e prindërve.
“U kisha bërë apel të gjithë prindërve të shtojnë kujdesin edhe më shumë ndaj fëmijëve të tyre. Ne fetarisht themi që fëmijët edukohen ende pa lindur, që në lindje është e preferuar t’i thirret ezani. Pastaj, gradualisht në forma të ndryshme, fëmijët duhet të mësohen në gjëra që u përshtaten. Fetarisht, kur mbushin 10 vite, ata obligohen të falin namaz, por vazhdimisht fëmijët duhet të edukohen, në veçanti që 5 vitet e para. Në periudhën e parë 5-vjeçare, mëson dhe edukohet përmes imitimit, e më së shumti ndikohen nga prindërit e tyre. Andaj, fëmijët duhet të edukohen që në ditët e para, mirëpo duke u rritur tu japin mësimet e edukatën që u përshtaten moshës”, tha Llumnica në emisionin special “Fanari”, kushtuar muajit të shenjtë të Ramazanit.
Njëkohësisht, Llumnica tregoi edhe disa mënyra se si duhet të përgatiten fëmijët për muajin e Ramazanit.
“Fëmijët e presin me mall Ramazanin për shkak të aktiviteteve e gjërave të bukura që bëhen. Andaj, ne duhet të jemi ata që u paraprijmë fëmijëve, t’i përgatisim ata, në mënyrë që ashtu si e presin Ramazanin, ashtu të ju dalë. Një Ramazan që t’i përmbushë fëmijët. Është mirë që familjarët të flasin me fëmijët para Ramazanit, mund të lexojnë ndonjë libër lidhur me këtë muaj, t’i mësojnë gjërat e bukura që ndodhin në Ramazan, pastaj të bëjnë një lloj planifikimi të aktiviteteve që bëhen në Ramazan”, tregoi tutje Llumnica në Tëvë1./teve1.info/.
