Drejtori i së ashtuquajturës Zyrës për Kosovën në Qeverinë e Serbisë, Petar Petkoviq, vlerëson se kryeministri i Kosovës Albin Kurti në asnjë formë nuk është i liruar nga obligimi për formimin e Asociacionit të Komunave me shumicë serbe, sipas katër marrëveshjeve të nënshkruara në Bruksel.
Petkoviq, duke iu përgjigjur deklaratës së Kurtit se marrëveshja për normalizimin e marrëdhënieve ndërmjet Beogradit dhe Prishtinës, e cila fillimisht u arrit në Bruksel dhe më pas në Ohër, nuk përmban autonomi për serbët në Kosovë, kërkoi që Prishtina “tani dhe menjëherë” të formojë Asociacionin e Komunave me shumicë serbe “siç është përcaktuar në dialogun e Brukselit”.
Petkoviq ka nënvizuar në Twitter se marrëveshja nga Ohri parasheh detyrimin e Prishtinës për të formuar Asociacionin në përputhje me “marrëveshjet e mëparshme përkatëse nga dialogu”, siç thuhet në aneksin e zbatimit të marrëveshjes, transmeton teve1.info.
