Janë nisur drejt ndërtesës së Qeverisë.
Kështu një numër i vogël i qytetarëve iu përgjigjën ftesës për protestë të thirrur nga Partia Socialdemokrate, për të kundërshtuar formimin e Asociacionit të komunave me shumicë serbe.
Pos qytetarëve, pjesë e kësaj proteste kishte përfaqësues edhe nga Nisma Socialdemokratike por edhe deputeti Hisen Berisha nga Partia Demokratike e Kosovës.
E kreu i PSD-së, Dardan Molliqaj tha se kryeministri Kurti me pranimin e kësaj marrëveshje, po krijon autonomi të serbëve në Kosovë.
Në shenjë kundërshtimi të kësaj marrëveshjeje, organizatorët hoqën flamujt e Kosovës në objektin e Qeverisë duke i zëvendësuar me të bardhë që simbolizojnë dorëzimin.
Po ashtu, në drejtim të Qeverisë u hodh edhe tym i zi, pasi siç tha Molliqaj simbolizon zymtësinë e kësaj marrëveshjeje për vendin.
Ndërkaq, edhe pjesëmarrësit e kësaj proteste shprehën revoltën e tyre ndaj kësaj marrëveshjeje dhe kryeministrit Albin Kurti.
Në fund, protestuesit u shpërndanë të qetë duke mos u shënuar kështu asnjë incident.
Kronika e realizuar nga gazetari Lindrit Zejnullahu.
