Deputeti nga radhët e PDK-së, Ferat Shala thotë se situata në Trust është alarmante dhe se humbjet gjatë këtij muaji janë rreth 60 milion euro.
Sipas tij, rreth 3 miliard euro të Trustit janë nën mëshirën e rrethanave dhe kohës, përcjell teve1.info
“Humbjet në Trust gjatë këtij muaji, janë rreth 60 milion euro! Situata në Trust është alarmante! Gjatë vitit 2022, të gjithë kontribuesit e vendit kanë humbur hiq më pak se 118 milion euro mjete të tyre në Trust. Trendi i rënies së aksioneve është në situatë shqetësuese edhe këtë vit. Vetëm gjatë këtij muaji që jemi tani, konkretisht nga data 1 mars deri më sot, në Trust kemi humbur rreth 60 milion euro! Përkundër kësaj situate, Qeveria ende nuk e ka vendosur bordin menaxhues. Rreth 3 miliard euro të Trustit janë në mëshirën e rrethanave dhe kohës, nën mëshirën e tregjeve globale, praktikisht nën mëshirën e askujt!”, ka shkruar ai në Facebook.
Ndër të tjerash, Shala ka pyetur “A ka Qeveri ky vend?!”.
“Jo shumë larg nga tash, kur Partia Demokratike kërkonte që një pjesë e mjeteve t’iu kthehej qytetarëve, atyre që kishin kontribuar, Qeveria dhe mazhoranca me këmbëngulje refuzuan dhe votuan kundër, në emër të ruajtjes së skemave sociale për moshën e penzionimit. Koha po e vërteton kërkesën e drejtë e legjitime të qytetarëve për Trustin, sidomos sot kur humbjet janë në total rreth 200 milion euro. A ka Qeveri ky vend?!”, është shprehur ai.
Që nga data 1 mars, Fondi i Kursimeve Pensionale ka mbetur pa bord drejtues.
Pas përfundimit të konkursit më 23 dhjetor, lista e kandidatëve dhe dokumentacioni përcjellës i është dorëzuar Komisionit Përzgjedhës, për të cilën ky institucion nuk ka më përgjegjësi e as të drejtë ndërhyrje dhe se procedurat tjera varen vetëm nga Kuvendi i Kosovës. /Teve1.info/