Trotuaret afër shkollës “ Emin Duraku” në Prishtinë janë të bllokuar nga veturat.
Për këtë shkak nxënësit po detyrohen të ecin në mes të rrugës.
Pos kësaj, ata po rrezikohen edhe nga stacioni i autobusëve i cili ndodhet në afërsi të shkollës.
Drejtori i shkollës, Visar Osmani, thotë se për këto shkaqe po krijohen vështirësi në qarkullimin e nxënëseve dhe mësimdhënësve.
Edhe mësimdhënësit po kërkojnë që trotuaret në afërsi të shkollës të lirohen.
Që hapësira për rreth shkollës të jetë më e lehtë e kalueshme po kërkojnë edhe nxënësit.
E për të rritur sigurinë, komuna ka nisur projektin “Rrugët për Fëmijë”.
“Nëpërmjet projektit “Rrugët për Fëmijë” do të krijojmë një mjedis më të sigurt dhe të këndshëm për fëmijët në hapësirat përreth shkollave të tyre. Pas disa muajsh analizë, matje, projektim, planifikim e takime me qytetarë, ju njoftojmë se punimet do të fillojnë të enjten, me datë 16 mars 2023, duke nisur me hapësirat përreth Sh.F.M.U “Elena Gjika”…”, thuhet në njoftimin e Komunës së Prishtinës.
Komuna e Prishtinës përmes një njoftim ka treguar se rruga prej Bulevardit “Zejnel Saliu”, nga udhëkryqi i rrugës “Emin Duraku”, e deri te kryqëzimi me rr. “Ernest Koliqi”, do të mbyllet përherë për qarkullimin e mjeteve motorike.
Kronika e gazetares Doresa Geci.
