“Vetmia është…n’vorr njeri që s’ka qare pa qenë vet se i gjalli vet s’duhet me qenë kurrë”.
Kështu shpreh mërzinë, pensionisti Mehdi Gashi nga Prishtina i cili tash e 15 vjet jeton i vetëm në shtëpinë e tij.
E në pamundësi që dikush të kujdeset për të, për ushqime e gjithçka çfare i nevojitet, 82-vjeçari shkon çdo ditë në Qendrën Sociale për të Moshuar.
Për të mos qëndruar i vetëm, gjithë ditën e kalon në Qendër me shokë.
Por në rast të ankesave shëndetësore, 82-vjeçari nuk ka dikë ku të mbështetet.
Mungesën e mbështetjes institucionale për kategorinë e pensionistëve e kritikon pensionisti Fazli Aliu.
Ndërsa sipas sociologut Genc Xërxa përkujdesja institucionale është shumë e rëndësishme për këtë kategori.
Madje ai krahason gjendjen në Kosovë me vendet e zhvilluara.
“Është shumë e rëndësishme sepse ne e dimë që përkujdesja ndaj të moshuarve mundet me qenë sociale apo familjare dhe institucionale. Secila e ka atë vlerën e vet. Në shtetet më të zhvilluara shkon përkujdesja institucionale më e madhe sesa familjare duke e ditur se familjarët 24 orë nuk mund të përkujdesen në mënyrë adekuate ndaj të moshuarve”, deklaroi Xërxa.
Në Kosovë janë pesë shtëpi për të moshuar. Vetëm në Shtëpinë e të Moshuarve në Prishtinë janë të sistemuar mbi 70 persona.
Kronika e gazetares Albiona Hajdari.
