Një ditë para takimit në Ohër, këshilltari i Departamentit amerikan të Shtetit, Derek Chollet ka zhvilluar biseda telefonike me dy protagonistët, kryeministrin Albin Kurti dhe presidentin Aleksandar Vuçiq.
Chollet ka thënë se me Kurtin ka diskutuar rreth bisedimeve të nesërme mbi normalizimin e marrëdhënieve me Serbinë përmes dialogut të ndërmjetësuar nga BE.
Sipas tij, implementimi do të mundësojë përfitime për të dyja vendet.
“Diskutova me kryeministrin Albin Kurti rreth bisedimeve të nesërme për normalizimin e marrëdhënieve me Serbinë përmes dialogut të lehtësuar nga BE. Implementimi do të mundësojë përfitime domethënëse për të dyja shtetet dhe do të tregojë përkushtim për një të ardhme paqësore për rajonin”, ka shkruar Chollet në një postim në Twitter.
Ndërkaq, bisedën me Vuçiqin e ka quajtur “të mrekullueshme”, teksa ka thënë se janë pajtuar për rëndësinë e përkushtimit mbi propozimin e BE-së.
“U pajtuam për rëndësinë e përkushtimit konstruktiv mbi propozimin e konsoliduar të BE-së më 18 mars. Rikonfirmova mbështetjen e SHBA-së rreth dialogut të BE-së dhe përfitimet që do të vijnë nga normalizimi i marrëdhënieve për Serbinë dhe të gjithë Ballkanin Perëndimor”, ka thënë Chollet.
Pikë kyçe e takimit të së shtunës në Ohër mes kryeministrit të Kosovës Albin Kurti dhe presidentit serb Aleksandar Vuçiq, do të jetë marrëveshja e bazuar në planin evropian. /Teve1.info/
